ലോകത്തെ ഏറ്റവും വില കുറഞ്ഞ കാര്‍ എന്ന ബഹുമതിയോടെ എത്തിയ ടാറ്റായുടെ നാനോ വിസ്മൃതിയിലേക്കോ ?
ചെറിയ ഫാമിലിക്ക് വലിയ യാത്ര നടത്താമെന്ന വാഗ്ദാനവുമായാണ് രത്തന്‍ടാറ്റ നാനോ കാറുമായി രംഗത്ത് എത്തുന്നത്. സാധാരണക്കാരുടെ കാര്‍ അതായിരുന്നു നാനോ കാറിന് ഉപയോക്താക്കള്‍ നല്‍കിയ വിളിപ്പേര്.
എന്നാല്‍ ഇതിന്റെ നിര്‍മാണം പൂര്‍ണ്ണമായും നിര്‍ത്തുന്നു എന്ന സൂചനയിലേക്കാണ് ഇപ്പോള്‍ കാര്യങ്ങള്‍ പോകുന്നത്. എല്ലാവരുടെയും മനം കവര്‍ന്ന ടാറ്റമോട്ടേഴ്‌സിന്റെ നാനോ കാര്‍ പ്രൊഡക്ഷന്‍ അവസാന ഘട്ടത്തിലാണെന്നാണ് പുതിയ റിപ്പോര്‍ട്ടുകള്‍.
ടാറ്റ ഗ്രൂപ്പിന്റെ മുന്‍ ചെയര്‍മാന്‍ രത്തന്‍ ടാറ്റയുടെ 'ബ്രെയിന്‍ ചൈല്‍ഡ്' എന്നു വിശേഷിപ്പിക്കപ്പെടുന്ന നാനോയുടെ മൂന്ന് യൂണിറ്റുകള്‍ മാത്രമാണ് ജൂണ്‍ മാസത്തില്‍ വിറ്റത്. ജൂണ്‍ മാസത്തില്‍ ഒറ്റ കാര്‍ മാത്രമാണ് നിര്‍മിച്ചത്. 2017 ജൂണില്‍ ഉത്പാദനം 275 കാറുകളായിരുന്നു. കഴിഞ്ഞ വര്‍ഷം ജൂണില്‍ 25 നാനോ കയറ്റുമതി ചെയ്തിരുന്നു. എന്നാല്‍ ഈ ജൂണില്‍ എക്‌സ്‌പോര്‍ട്ട് വട്ടപൂജ്യമാണ്. പക്ഷെ, ഉത്പാദനം നിര്‍ത്തുന്ന കാര്യത്തില്‍ കമ്പനി അന്തിമ തീരുമാനത്തിലെത്തിയിട്ടില്ല.
ഉത്പാദനം നിര്‍ത്തുകയാണോ എന്ന ചോദ്യത്തിന് ടാറ്റയുടെ വക്താവിന്റെ മറുപടി ഇങ്ങനെ ഇന്നത്തെ നിലയില്‍ നാനോയ്ക്ക് 2019നപ്പുറം പോകാന്‍ കഴിയില്ലെന്ന് ഞങ്ങള്‍ക്ക് വ്യക്തമായി അറിയാം. നിലനില്‍ക്കണമെങ്കില്‍ പുതിയ ഇന്‍വെസ്റ്റ്‌മെന്റ് ആവശ്യമാണ്. എന്നാല്‍ ഇക്കാര്യത്തില്‍ ഒരു അന്തിമ തീരുമാനം എടുത്തിട്ടില്ല. എന്നാല്‍ കസ്റ്റമര്‍ ഡിമാന്റുള്ള കീ മാര്‍ക്കറ്റുകള്‍ക്ക് വേണ്ടി ഉത്പാദനം തുടരും.
2008ലെ ഡല്‍ഹി ആട്ടോ എക്‌സ്‌പോയിലാണ് ടാറ്റ നാനോയുടെ ചരിത്രം തിരുത്തിയ രംഗപ്രവേശം. 'ഒരു ലക്ഷം രൂപയ്ക്കു കാര്‍' എന്ന രത്തന്‍ ടാറ്റയുടെ പ്രഖ്യാപനം വലിയ ആവേശത്തോടെയാണ് ലോകം വരവേറ്റത്. 2009 മാര്‍ച്ചില്‍ നാനോ ഇന്ത്യന്‍ മാര്‍ക്കറ്റിലെത്തി. ലോകത്തെ ഏറ്റവും വില കുറഞ്ഞ കാര്‍ എന്ന ഖ്യാതി നേടിയ നാനോ ആദ്യ ഘട്ടത്തില്‍ വിപണിയില്‍ താരമായി. എന്നാല്‍ തുടക്കത്തിലെ ഉപയോക്താക്കള്‍ ചില പോരായ്മകള്‍ ചൂണ്ടിക്കാട്ടിയിരുന്നു. ജനങ്ങളുടെ പ്രതീക്ഷക്കൊത്ത് നാനോ ഉയര്‍ന്നില്ലെന്ന വാദവും ശക്തമാണ്. സാങ്കേതിക തകരാറുകള്‍ കൂടുതല്‍ പ്രശ്‌നമായി. ഇന്ധന ടാങ്ക് മുമ്പിലാണെന്നത് അപകട സാധ്യത കൂട്ടുന്ന ഘടകമായി. കാറിന് തീ പിടിച്ച സംഭവങ്ങള്‍ ഒന്നിന് പുറകെ ഒന്നായി ഉണ്ടായി. വില രണ്ടു ലക്ഷത്തിന് അടുത്താവുകയും ചെയ്തതും വിപണിയില്‍ തിരിച്ചടിയായി. ഇതെല്ലാം കസ്റ്റമേഴ്‌സിനെ നാനോയില്‍ നിന്ന് അകറ്റി.
ബംഗാളിലെ സിംഗൂരിലാണ് ഫാക്ടറി ആദ്യം സ്ഥാപിച്ചത്. എന്നാല്‍ ബംഗാളില്‍ നാനോയുടെ നിര്‍മ്മാണവുമായി ബന്ധപ്പെട്ട സ്ഥലമേറ്റെടുപ്പ് സംഘര്‍ഷത്തില്‍ കലാശിച്ചത് മറ്റൊരു വശം. തുടര്‍ന്ന് നിര്‍മ്മാണം ഗുജറാത്തിലെ സാനന്ദിലേക്ക് മാറ്റുകയായിരുന്നു. ബംഗാളില്‍ ഇടതു ഭരണം അവസാനിക്കുന്നതിന്റെ പ്രധാന കാരണങ്ങളില്‍ ഒന്ന് സിംഗൂര്‍ പ്രക്ഷോഭമായിരുന്നു. ഒടുവില്‍ ഇക്കാര്യത്തില്‍ കമ്ബനിക്ക് തെറ്റ് പറ്റിയെന്ന് രത്തന്‍ ടാറ്റയ്ക്ക് തന്നെ സമ്മതിക്കേണ്ടി വന്നു. മാത്രവുമല്ല, ടാറ്റ ഗ്രൂപ്പിന് ഇത് ഒരു തലവേദനയുമായി. മോഡല്‍ വന്‍ നഷ്ടത്തിലായത് ടാറ്റ സണ്‍സിന്റെ മുന്‍ ചെയര്‍മാന്‍ സൈറസ് മിസ്ത്രി ഗ്രൂപ്പുമായി ഭിന്നതയിലാകുന്നതിന് ഒരു കാരണമായി. രത്തന്‍ ടാറ്റ നാനോയെ ശക്തമായി പിന്തുണച്ചപ്പോള്‍ ഉല്പാദനവുമായി മുന്നോട്ട് പോകാനാകില്ലെന്ന നിലപാടുകാരനായിരുന്നു മിസ്ത്രി.
നാനോ കാര്‍ ഉത്പാദനം നിര്‍ത്തുകയാണെന്ന വാര്‍ത്തകള്‍ പ്രചരിക്കുമ്പോള്‍ സാധാരണക്കാരന്റെ കാര്‍ ഇനി റോഡുകളില്‍ കാണാന്‍ കഴിയുമോയെന്ന ആശങ്കയിലാണ് നാനോയെ ഇഷ്ട്ടപ്പെടുന്ന ചിലര്‍.
https://www.facebook.com/Malayalivartha
