കാറുവാങ്ങാന്‍ പോന്നോളൂ. പ്രമുഖ വാഹന നിര്‍മ്മാതാക്കളായ മാരുതി തങ്ങളുടെ ഉത്സവ സീസണ്‍ ഓഫര്‍ പ്രഖ്യാപിച്ചു. പുതിയ ഓഫര്‍ പ്രകാരം 70,000 രൂപയുടെ വരെ വിലക്കിഴിവ് നേടാന്‍ ഉപഭോക്താക്കള്‍ക്ക് കഴിയും. ആള്‍ട്ടോ 800, ആള്‍ട്ടോ കെ10, വാഗണ്‍ആര്‍, സെലറിയോ, എര്‍ട്ടിഗ, ഇഗ്‌നിസ്, സ്ഫിറ്റ് ഡിസയര്‍ എന്നീ മോഡലുകള്‍ക്കാണ് ഓഫര്‍. 

55,000 രൂപയാണ് ആള്‍ട്ടോ 800 ഹാച്ച്ബാക്കില്‍ കമ്പനി പ്രഖ്യാപിച്ചിട്ടുള്ള വിലക്കിഴിവ്. 25,000 രൂപയുടെ വിലക്കിഴിവും (വകഭേദങ്ങളില്‍ മുഴുവന്‍) 30,000 രൂപയും എക്‌സ്‌ചേഞ്ച് ബോണസും ഉള്‍പ്പെടെയാണിത്. ആള്‍ട്ടോ കെ10 മാനുവല്‍ പതിപ്പില്‍ 22,000 രൂപയുടെ വിലക്കിഴിവാണ് മാരുതി നല്‍കുന്നത്. എഎംടി മോഡലുകള്‍ക്ക് 27,000 രൂപ വിലക്കിഴിവ് ലഭിക്കും. മാനുവല്‍, എഎംടി മോഡലുകള്‍ക്ക് യഥാക്രമം 30,000 രൂപ, 35,000 രൂപ എന്നിങ്ങനെയാണ് എക്‌സ്‌ചേഞ്ച് ബോണസ്.
സ്വിഫ്റ്റ് പെട്രോളില്‍ 20,000 രൂപയുടെ വിലക്കിഴിവാണ് മാരുതി പ്രഖ്യാപിച്ചിട്ടുള്ളത്. സെപ്ഷ്യല്‍ എഡിഷന്‍ സ്വിഫ്റ്റ് പെട്രോളില്‍ 27,000 രൂപ ഡിസ്‌കൗണ്ട് ലഭിക്കും. 10,000 രൂപയാണ് സ്വിഫ്റ്റ് ഡീസലില്‍ കമ്പനി നല്‍കുന്ന വിലക്കിഴിവ്. 20,000 രൂപ, 25,000 രൂപ എന്നിങ്ങനെയാണ് പെട്രോള്‍, ഡീസല്‍ മോഡലുകളില്‍ ലഭ്യമായ എക്‌സ്‌ചേഞ്ച് ബോണസ്. ഡിസൈര്‍ പെട്രോള്‍ മോഡലുകളില്‍ 20,000 രൂപയാണ് മാരുതി പ്രഖ്യാപിച്ചിരിക്കുന്ന വിലക്കിഴിവ്. സ്‌പെഷ്യല്‍ എഡിഷന്‍ ഡിസൈറില്‍ 27,000 രൂപ വരെ ആനുകൂല്യങ്ങള്‍ നേടാം. ഡിസൈര്‍ ഡീസല്‍ മോഡലുകളില്‍ 10,000 രൂപയാണ് ഉപഭോക്താക്കള്‍ക്ക് ഡിസ്‌കൗണ്ട് ലഭിക്കുക. ഇതിനു പുറമെ 20,000 രൂപയുടെ എക്‌സ്‌ചേഞ്ച് ബോണസ് ഡിസൈര്‍ പെട്രോളിലും 30,000 രൂപയുടെ എക്‌സ്‌ചേഞ്ച് ബോണസ് ഡിസൈര്‍ ഡീസലിലും കമ്പനി നല്‍കും. 7,000 രൂപയുടെ വിലക്കിഴിവ് ബലെനോയില്‍ ഉപഭോക്താക്കള്‍ക്ക് ലഭിക്കും. കൂടാതെ 15,000 രൂപയുടെ എക്‌സ്‌ചേഞ്ച് ബോണസും കാറില്‍ നേടാം. ഇവയ്ക്ക് പുറമേ രാജ്യത്ത് ഏറ്റവും പ്രചരമുള്ള സ്വിഫ്റ്റ്, ബലെനോ ഹാച്ച്ബാക്കുകള്‍ക്കും കമ്പനി ഡിസ്‌കൗണ്ട് പ്രഖ്യാപിച്ചിട്ടുണ്ട്.