ആഗോള ക്രിപ്‌റ്റോ കറന്‍സി വിപണി രണ്ടു ലക്ഷം കോടി മാര്‍ക്ക് പിന്നിട്ടതിനു പിന്നാലെ പ്രമുഖ കോയിനുകളുടെ മൂല്യത്തിൽ നേരിയ കുറവ്. മൂന്നു മാസത്തിനിടെ ആദ്യമായി ഇന്നലെ ക്രിപ്‌റ്റോ കറന്‍സികളുടെ മൂല്യം രണ്ടു ലക്ഷം കോടി പിന്നിട്ടിരുന്നു.

ഇതേത്തുടര്‍ന്നു ബിറ്റ്‌കോയിന്‍ മൂല്യവും കുതിച്ചിരുന്നു. രാജ്യാന്തര തലത്തിലും ഇന്ത്യയിലുമടക്കം ക്രിപ്‌റ്റോ കറന്‍സികള്‍ക്ക് മികച്ച പിന്തുണ ലഭിക്കുന്നതാണ് കുതിപ്പിനു വഴിവച്ചത്. നേരിയ തോതില്‍ ലാഭമെടുപ്പ് നടന്നതിനെ തുടര്‍ന്ന് ബിറ്റ്‌കോയിൻെറ മൂല്യം ഇന്ന് രണ്ടു ശതമാനം കുറഞ്ഞ് 44,962 ഡോളറിലെത്തി. കഴിഞ്ഞ ദിവസം ഇത് 46,233 ഡോളറായിരുന്നു.

എതേറിയത്തിൻെറ മൂല്യം നാലു ശതമാനം ഇടിഞ്ഞ് 3,109 ഡോളറിലെത്തിയിട്ടുണ്ട്. ഡോഷ് കോയിൻെറ മൂല്യം ഇന്ന് ഏഴു ശതമാനമാണ് ഇടിഞ്ഞത്. നിലവില്‍ ഡോഷിന് 0.26 ഡോളറാണ്. എക്‌സ്.ആര്‍.പി, ലൈറ്റ് കോയിന്‍, സ്‌റ്റെല്ലര്‍ എന്നിവയിലെ ഇടിവ് 4-6 ശതമാനമാണ്.

അതേസമയം കാര്‍ഡാനോയുടെ മൂല്യം ഒരു ശതമാനത്തോളം ഉയര്‍ന്ന് 1.8 ഡോളറിലെത്തി. മേയ്ക്കു ശേഷം ഇതാദ്യമായാണ് ഇന്നലെ ക്രിപ്‌റ്റോകറന്‍സികളുടെ മൂല്യം രണ്ടു ലക്ഷം കോടി ഡോളര്‍ പിന്നിട്ടത്. ഒരു ബിറ്റ്‌കോയിന് ഏകദേശം നിലവില്‍ 32- 34 ലക്ഷം രൂപ വില വരും. രാജ്യാന്തരതലത്തില്‍ ക്രിപ്‌റ്റോ കറന്‍സികളുടെ ഉപയോഗവും സ്വീകാര്യതയും വര്‍ധിക്കുകയാണ്.

ഓഹരി വിപണികളുടെ കുതിപ്പ് തുടര്‍ന്നാല്‍ ഈ വര്‍ഷം അവസാനത്തോടെ ബിറ്റ്‌കോയിന്‍ മൂല്യം ഒരു ലക്ഷം ഡോളര്‍ പിന്നിടുമെന്നു വിലയിരുത്തല്‍. ഇന്ത്യന്‍ ക്രിപ്‌റ്റോ കറന്‍സി എക്‌സ്‌ചേഞ്ചായ വാസിര്‍ എക്‌സിലെ പുതിയ ഉപയോക്താക്കളുടെ എണ്ണത്തില്‍ 2,648 ശതമാനം വര്‍ധന രേഖപ്പെടുത്തി. പുതുതായി എത്തിയവരില്‍ കൂടുതലും സ്ത്രീകളാണ്.

നിലവില്‍ വിപണിയിലുള്ളത് 73 ലക്ഷം സജീവ ഉപയോക്താക്കളാണ്.. 2021ല്‍ ഇതുവരെ നടന്നത് 2180 കോടി ഡോളറിൻെറ ഇടപാടാണ്. 1.5 കോടി ഇന്ത്യന്‍ ഉപയോക്താക്കള്‍ കൈകാര്യം ചെയ്യുന്നത് 1500 കോടി ഡോളറിൻെറ ക്രിപ്‌റ്റോ ആസ്തികളാണ്. ക്രിപ്‌റ്റോ കറന്‍സികള്‍ 21-ാം നൂറ്റാണ്ടിലെ പ്രമുഖ ആസ്തി വിഭാഗമാകുമെന്നാണു വിലയിരുത്തല്‍.