നോടോ എന്ന ഐസ്‌ക്രീം നിര്‍മാണ കമ്പനിയില്‍ മുതല്‍ മുടക്കി ബോളിവുഡ് താരം ജോണ്‍ എബ്രഹാം. വിവിധ വെഞ്ച്വര്‍ കാപിറ്റല്‍ ഫണ്ടുകളില്‍ നിന്നായി നാല് കോടി രൂപയാണ് കമ്പനി സമാഹരിച്ചത്.

ടൈറ്റന്‍ കാപിറ്റല്‍, റോക്ക്സ്റ്റഡ് കാപിറ്റല്‍, ഡബ്ല്യുഇഎച്ച് വെഞ്ച്വേര്‍സ് എന്നീ സ്ഥാപനങ്ങളാണ് ജോണ്‍ എബ്രഹാമിനെ കൂടാതെ കമ്പനിയില്‍ നിക്ഷേപം നടത്തിയിരിക്കുന്നത്. കമ്പനിയുടെ വികസനത്തിനും കൂടുതല്‍ ഉല്‍പ്പന്നങ്ങള്‍ വികസിപ്പിക്കുന്നതിനും ഒക്കെയായി കമ്പനി തുക കണ്ടെത്തിയേക്കും എന്നാണ് വിവരം.

ലോ കലോറി ഐസ്‌ക്രീം നിര്‍മാതാക്കളാണ് നോടോ. 125 മില്ലി ലിറ്റര്‍ ഐസ്‌ക്രീമില്‍ 75 മുതല്‍ 95 ഗ്രാം കലോറി വരെ മാത്രമേയുള്ളൂവെന്നാണ് കമ്പനി അവകാശപ്പെടുന്നത്. മൂന്ന് ഗ്രാമാണ് കൊഴുപ്പെങ്കില്‍ പഞ്ചസാര 75 ശതമാനം കുറവാണ്. മറ്റ് ഐസ്‌ക്രീമുകളെ അപേക്ഷിച്ച് കൂടുതല്‍ പ്രോട്ടീനുണ്ടെന്നും കമ്പനി അവകാശപ്പെടുന്നു.

ഇതുവരെ അഞ്ച് ലക്ഷം യൂണിറ്റ് ഐസ്‌ക്രീമുകളാണ് കമ്പനി വിറ്റഴിച്ചത്. 30000 ഉപഭോക്താക്കള്‍ക്കാണ് ഐസ്‌ക്രീം നല്‍കിയിരിക്കുന്നത്. ശക്തമായ പ്രൊമോട്ടര്‍മാരും ഓണ്‍-പോയിന്റ് ബ്രാന്‍ഡിംഗും ഉള്ള വ്യവസായം ആയാണ് നോടോയുടെ ബിസിനസ് കാണുന്നതെന്നും അതുകൊണ്ടാണ് നിക്ഷേപമെന്നും ജോണ്‍ എബ്രഹാം വ്യക്തമാക്കി.

മാത്രമല്ല, ആരോഗ്യകരമാണെന്നതും ബ്രാന്‍ഡിലേയ്ക്ക് തന്നെ ആകര്‍ഷിച്ചു എന്നും അദ്ദേഹം വ്യക്തമാക്കി. നിക്ഷേപത്തിലൂടെ മറ്റ് ബിസിനസുകള്‍ക്കൊപ്പം ഐസ്‌ക്രീം ബ്രാന്‍ഡിനും ഉടമയായിരിക്കുകയാണ് അദ്ദേഹം. വരുണ്‍ - ആഷ്‌നി എന്നീ ദമ്പതിമാര്‍ ചേര്‍ന്ന് 2018- ലാണ് ഈ ഐസ്‌ക്രീം ബ്രാന്‍ഡ് തുടങ്ങിയത്.