വ്യക്തിഗത ആസ്തികൊണ്ട് പാകിസ്താനെ പിന്നിലാക്കി ഇലോണ്‍ മസ്‌ക്. മസ്‌കിന്റെ കൈവശം ഇപ്പോള്‍ പാക്കിസ്ഥാന്റെ മൊത്ത ആഭ്യന്തര ഉല്‍പ്പാദനത്തെക്കാളും അല്ലെങ്കില്‍ ജി.ഡി.പിയെക്കാളും കൂടുതല്‍ പണമുണ്ട്. ടെസ്ല, സ്പേസ്എക്സ് എന്നിവയുടെ സി.ഇ.ഒ. ആയ മസ്‌കിന്റെ ആസ്തി 300 ബില്യണ്‍ ഡോളറിലേക്ക് അടുക്കുകയാണെന്നാണു റിപ്പോര്‍ട്ടുകള്‍ വ്യക്തമാക്കുന്നത്.

ലോകത്ത് 300 ബില്യണ്‍ ഡോളര്‍ ആസ്തി കൈവരിക്കുന്ന ആദ്യ വ്യക്തിയെന്ന ബഹുമതിയും മസ്‌ക് ഉടനെ കൈവരിക്കുമെന്നു സാരം. നിലയില്‍ അദ്ദേഹത്തിന്റെ വ്യക്തിഗത ആസ്തി 292 ബില്യണ്‍ ഡോളറാണ്. 22 കോടി ആളുകള്‍ വസിക്കുന്ന പാകിസ്താന്റെ ആസ്തി 2020- 21 പ്രകാരം 280 ബില്യണ്‍ ഡോളറാണ്.

ഹെര്‍ട്‌സ് ഗ്ലോബല്‍ ഹോള്‍ഡിങ്‌സില്‍ നിന്ന് ഒരു ലക്ഷം കാറുകളുടെ ഓര്‍ഡര്‍ ലഭിച്ചതു വഴി ടെസ്ലലയുടെ ഓഹരിമൂല്യം അടുത്തിടെ കുതിച്ചുയര്‍ന്നിരുന്നു. ഇതുവഴി മസ്‌കിന്റെ ആസ്തി 3600 കോടി ഡോളറാണു വര്‍ധിച്ചത്. ലോകത്തിലെ ഏറ്റവും മൂല്യമേറിയ വാഹന നിര്‍മാതാക്കളെന്ന ബഹുമതി കൂടിയാണ് ടെസ്ല ഇതുവഴി സ്വന്തമാക്കിയതെന്നു രാജ്യാന്തര വാര്‍ത്താ ഏജന്‍സിയായ റോയിട്ടേഴ്‌സിന്റെ റിപ്പോര്‍ട്ടുകള്‍ വ്യക്തമാക്കുന്നുണ്ട്.

23 ശതമാനം ഓഹരി പങ്കാളിത്വമാണ് മസ്‌കിനു ടെസ്ലയിലുള്ളത്. തിങ്കളാഴ്ചത്തെ പ്രകടനത്തോടെ ഒരു ലക്ഷം കോടി ഡോളര്‍ വിപണി മൂല്യമുള്ള എലൈറ്റ് കമ്പനികളുടെ പട്ടികയിലും ടെസ്ല സ്ഥാനം പിടച്ചു. ബ്ലൂംബെര്‍ഗ് ശതകോടീശ്വര പട്ടികയില്‍ നേരത്തെ ഒന്നാം സ്ഥാനത്തായിരുന്ന ആമസോണ്‍ സി.ഇ.ഒ. ജെഫ് ബെസോസിനേക്കാള്‍ 100 ബില്യണ്‍ ഡോളറിന്റെ ആസ്തി നിലവില്‍ മസ്‌കിനുണ്ട്.

മസ്‌കിന്റെ ആസ്തി നിലവില്‍ ലോകത്തിലെ രണ്ടാമത്തെ വലിയ വാഹന നിര്‍മ്മാതാക്കളായ ടൊയോട്ടയുടെ വിപണി മൂല്യത്തേക്കാള്‍ കൂടുതലാണെന്നും റിപ്പോര്‍ട്ടുകളുണ്ട്. ടൊയോട്ടയുടെ മൂല്യം ഏകദേശം 283 ബില്യണ്‍ ഡോളറാണ്. ടെസ്ലയ്ക്കു പുറമേ സ്പേസ് എക്സില്‍ നിന്നുള്ള വരുമാനം മസ്‌കിനു ബോണസാണ്. സ്‌പേസ് എക്‌സിന്റെ മൂല്യം അടുത്തിടെ 100 ബില്യണ്‍ ഡോളറായി ഉയര്‍ന്നിരുന്നു. ലോകത്തിലെ ഏറ്റവും മൂല്യമുള്ള രണ്ടാമത്തെ സ്വകാര്യ കമ്പനിയെന്ന ബഹുമതിയും സ്പേസ് എക്സിന് അര്‍ഹതപ്പെട്ടതാണ്.