ഇന്ത്യയിലെ രണ്ടാമത്തെ വലിയ ഐടി കമ്പനിയായ ഇന്‍ഫോസിസിന്റെ പുതിയ ചീഫ് എക്‌സിക്യൂട്ടീവ് ഓഫീസര്‍ വിശാല്‍ സിക്കയ്ക്ക് വാര്‍ഷിക ശമ്പളം 30 കോടി രൂപ (50.8 ലക്ഷം ഡോളര്‍). അതായത്, പ്രതിമാസം രണ്ടരക്കോടി രൂപ. ഇതോടെ ഇന്ത്യന്‍ കമ്പനികളില്‍ ഏറ്റവുമധികം ശമ്പളം പറ്റുന്ന സി.ഇ.ഒ.മാരില്‍ ഒരാളായി 47-കാരനായ സിക്ക. 

ശമ്പളത്തിന് പുറമെ 12 കോടി രൂപ (20 ലക്ഷം ഡോളര്‍) മൂല്യമുള്ള ഓഹരിയും അദ്ദേഹത്തിന് ലഭിക്കും. അതായത്, മൊത്തം 70.8 ലക്ഷം ഡോളറാണ് വാര്‍ഷിക പ്രതിഫലം. മൈക്രോസോഫ്റ്റ് മേധാവിയുടെ വാര്‍ഷിക പ്രതിഫലം 1.8 കോടി ഡോളറും ഐ.ബി.എം. സി.ഇ.ഒ.യുടേത് 1.62 കോടി ഡോളറുമാണ്. 
എസ്.ഡി. ഷിബുലാല്‍ സ്ഥാനമൊഴിയുന്നതിനെത്തുടര്‍ന്നാണ് വിശാല്‍ സിക്കയെ ഇന്‍ഫോസിസ് അടുത്ത സി.ഇ.ഒ. ആയി തിരഞ്ഞെടുത്തത്. സാപ് ടെക്‌നോളജീസിന്റെ ചീഫ് ടെക്‌നോളജി ഓഫീസറും ഡയറക്ടര്‍ ബോര്‍ഡ് അംഗവുമായിരുന്നു അദ്ദേഹം. ആഗസ്ത് ഒന്നിന് ഇന്‍ഫോസിസിന്റെ സി.ഇ.ഒ. ആയി ചുമതലയേല്‍ക്കും.