രാജ്യത്ത് സ്വകാര്യ ടെലികോം കമ്പനികള്‍ മത്സരിക്കുന്നതിനിടെ വമ്പന്‍ ഓഫറുകളുമായി ബി.എസ്.എന്‍.എല്‍ രംഗത്ത്. 999 രൂപയുടെ പുതിയ പ്രീപെയിഡ് പ്ലാനാണ് ഉപഭോക്താക്കള്‍ക്കായി ബി.എസ്.എന്‍.എല്‍ അവതരിപ്പിക്കുന്നത്.
പ്ലാന്‍ പ്രകാരം ഒരു വര്‍ഷത്തേക്ക് ദിവസേന ഒരു ജി.ബി ഡാറ്റയും ആറ് മാസത്തേക്ക് അണ്‍ലിമിറ്റഡ് കോളുകളും ലഭിക്കും. മുംബയ് ഡല്‍ഹി ഒഴികെയുള്ള സ്ഥലങ്ങളില്‍ റോമിംഗ് കോളുകളും ഈ പ്ലാനില്‍ സൗജന്യമായിരിക്കും. ദിവസേന 100 എസ്.എം.എസ് സന്ദേശങ്ങളും സൗജന്യമായിരിക്കും. മുംബയ്, ഡല്‍ഹി എന്നിവിടങ്ങളില്‍ നിന്നും വിളിക്കുമ്പോള്‍ ഒരു മിനിറ്റിനു 60 പൈസ വേണ്ടിവരും. ഒരു ജി.ബിക്ക് ശേഷമുള്ള ഡാറ്റ ഉപയോഗത്തിന് പക്ഷേ 40 കെ.ബി.പി.എസ് മാത്രമായിരിക്കും സ്പീഡ് ലഭിക്കുക.
വടക്ക് കിഴക്കന്‍ സംസ്ഥാനങ്ങളിലും ജമ്മു കാശ്മീര്‍, അസാം എന്നീ സംസ്ഥാനങ്ങളില്‍ ഈ ഓഫര്‍ ലഭ്യമാകില്ല. ആറ് മാസത്തിന് ശേഷം ഒരു വര്‍ഷം വരെ കോളുകള്‍ക്ക് മിനിറ്റിന് 60 പൈസ വീതം നല്‍കേണ്ടി വരും.