ടൂറിസം കേന്ദ്രങ്ങളിലേക്ക് സഞ്ചാരികളെ എത്തിക്കുന്നതിന് കെ.ടി.ഡി.സിയുടെ ആഡംബര ബസുകള്‍ നിരത്തിലേക്ക് . മൂന്ന് ആഡംബര ബസുകളാണ് ബസ് ടൂര്‍' പദ്ധതിയുടെ ഭാഗമായി സര്‍വീസ് ആരംഭിച്ചത്. ആദ്യഘട്ടത്തില്‍ തിരുവനന്തപുരത്തും കൊച്ചിയിലുമാണ് സര്‍വീസ് നടത്തുന്നത്. ചൊവ്വ, ബുധന്‍, വ്യാഴം, വെള്ളി ദിവസങ്ങളില്‍ നടത്തുന്ന തിരുവനന്തപുരം ടൂറിന് 899 രൂപയാണ് ടിക്കറ്റ് നിരക്ക്.
തിങ്കള്‍ ഒഴിച്ചുള്ള ദിവസങ്ങളില്‍ നടത്തുന്ന തിരുവനന്തപുരം കന്യാകുമാരി യാത്രയ്ക്ക് നിരക്ക് 1,500 രൂപ. റിഫ്രഷിംഗ് പൊന്മുടി' എന്ന പാക്കേജില്‍ കെ.ടി.ഡി.സിയുടെ ഹോട്ടലായ പൊന്മുടി ഗോള്‍ഡന്‍ പീക്കില്‍ താമസ സൗകര്യവും ഒരുക്കും. 2,655 രൂപയാണ് പൊന്മുടി പാക്കേജിന്റെ നിരക്ക്. കൊച്ചിയില്‍ ബോള്‍ഗാട്ടി പാലസ് മുതല്‍ മട്ടാഞ്ചേരി, ഫോര്‍ട്ട് കൊച്ചി, തൃപ്പൂണിത്തുറ ഹില്‍പാലസ് സന്ദര്‍ശന പാക്കേജിനും ചെറായി ബീച്ചടക്കം സന്ദര്‍ശിക്കാവുന്ന അള്‍ട്ടിമേറ്റ് കൊച്ചി ടൂര്‍ പാക്കേജിനും 1,000 രൂപ വീതമാണ് നിരക്ക്.

24 സീറ്റുകളുള്ള ആഡംബര ബസുകളില്‍ പരിശീലനം ലഭിച്ച ഗൈഡുകളും ഉണ്ടാകും. സ്ഥലങ്ങളെ കുറിച്ചുള്ള വിവരങ്ങള്‍ മൂന്ന് ഭാഷകളില്‍ കേള്‍ക്കാം.