വിഷുവിനോടനുബന്ധിച്ച് ബിഎസ്എന്‍എല്‍ കേരള പുതിയ ബ്രോഡ്ബാന്‍ഡ് പദ്ധതി പ്രഖ്യാപിച്ചു. പുതുതായി പ്രതിമാസം 1199 രൂപയുടെ കുടുംബ ബ്രോഡ് ബാന്‍ഡ് കണക്ഷന്‍ എടുക്കുന്നവര്‍ക്ക് മൂന്ന് മൊബൈല്‍ സിം കാര്‍ഡ് കൂടി സൗജന്യമായി നല്‍കും. ഇന്ത്യയില്‍ എവിടെക്കും പരിധിയില്ലാതെ വിളിക്കാനുള്ള സൗകര്യം ഈ മൂന്നു സിംകാര്‍ഡുകളിലുണ്ടാകും. മുംബൈ, ഡല്‍ഹി എന്നിവിടങ്ങളിലൊഴിച്ച് റോമിങ്ങിലായിരിക്കുമ്പോഴും ഈ സൗജന്യങ്ങള്‍ ലഭ്യമാവും. ഏതെങ്കിലും ഒരു സിം കാര്‍ഡില്‍ ഓണ്‍ലൈന്‍ ടിവിയും ലഭ്യമാകും.

കൂടാതെ പ്ലസ് ടു വരെയുള്ള വിദ്യാര്‍ത്ഥികള്‍ക്ക് ഏതെങ്കിലും ഒരു വിഷയത്തില്‍ ഒരു മാസത്തേക്ക് ഓണ്‍ലൈന്‍ വിദ്യാഭ്യാസത്തിനുളള നിരക്കും ഒരു സിമ്മില്‍ സൗജന്യമായി അനുവദിച്ചിട്ടുണ്ട്. 1 ജിബി വരെ ഉപയോഗത്തിനു ശേഷം 40 കെ ബിപിഎസ് ആയി വേഗം കുറയുന്ന പരിധിയില്ലാത്ത ഡാറ്റ, സൗജന്യ റിങ്ബാക്ക് ടോണ്‍ എന്നീ സൗകര്യങ്ങളും ഈ മൊബൈല്‍ കണക്ഷനുകള്‍ക്കുണ്ടായിരിക്കും.

വാര്‍ഷിക ദൈ്വവാര്‍ഷികം, ത്രൈവാര്‍ഷിക അടവുകാര്‍ക്ക് യഥാക്രമമുള്ള അധിക സൗജന്യങ്ങള്‍ ഉണ്ടായിരിക്കും. സ്റ്റാറ്റിക് ഐപി വിലാസം വേണമെങ്കില്‍ പ്രതിവര്‍ഷം 2000 രൂപ അധികം നല്‍കണം. ചുരുങ്ങിയ ഉപയോഗ കാലയളവ് ഒരു മാസമായും നിക്ഷേപത്തുക ഒരു മാസത്തെ നിരക്കായും നിജപ്പെടുത്തിയിട്ടുണ്ട്.

ഏത് നെറ്റ് വര്‍ക്കിലേക്കും എപ്പോഴും സൗജന്യമായി വിളിക്കാന്‍ കഴിയുന്ന ലാന്‍ഡ് ലൈന്‍ ഓഫര്‍, 30 ജിബിവരെ 10 എംബിപിഎസ് വേഗത്തിലും തുടര്‍ന്ന് 2 എംബിപിഎസ് വേഗത്തിലും ലഭിക്കുന്ന പരിധിയില്ലാത്ത ഡൈറ്റാ സൗകര്യം എന്നിവയ്ക്ക് പുറമെയാണ് ഈ പദ്ധതി.