ഓണ്‍ലൈനില്‍ ഓര്‍ഡര്‍ ചെയ്ത പ്രകാരം സാധനങ്ങൾ എത്തി; ദുര്‍ഗന്ധം വമിക്കുന്ന ബോക്സ് പൊട്ടിച്ചപ്പോൾ കിട്ടിയത് ചത്ത മുതലയെയും പല്ലിയെയും
ചൈനയിൽ ഹെല്‍ത്ത് കെയര്‍ ഉത്പന്നങ്ങൾ ഓണ്‍ലൈനില്‍ ഓര്‍ഡര്‍ ചെയ്ത ചൈനീസ് യുവതിയ്ക്ക് കിട്ടിയത് ചത്ത മുതലയെയും പല്ലിയെയും. ചൈനയിലെ സിയാംഗ് പ്രവിശ്യയിലുള്ള സുയിചാങിലെ ഷാംഗ് എന്ന യുവതിയ്ക്കാണ് ഇത്തരത്തിലൊരു അമളി പറ്റിയത്.
മൂന്ന് ബോക്സുകളാണ് ഓര്‍ഡര്‍ പ്രകാരം ലഭിച്ചത്. രണ്ട് ബോക്‌സാണ് ആദ്യം തുറന്ന് നോക്കിയത്. മൂന്നാമത്തേത് പൊട്ടിച്ചു നോക്കിയുമില്ല. ഒടുവില്‍ ബോക്‌സില്‍ നിന്നും ദുര്‍ഗന്ധം പുറത്തുവന്നതിനെ തുടര്‍ന്നാണ് ചത്ത മുതലയെയും പല്ലിയേയും കണ്ടതെന്ന് ഷാംഗായിസ്റ്റ് റിപ്പോര്‍ട്ട് ചെയ്യുന്നു. ഇതിന്റെ ഒരു വീഡിയോ ചൈനീസ് സോഷ്യല്‍ നെറ്റ് വര്‍ക്കിംഗ് സൈറ്റായ വെയ്ബോയിലും പോസ്റ്റ് ചെയ്തിട്ടുണ്ട്.
സംഭവത്തെക്കുറിച്ച്‌ യുവതിയും ഭര്‍ത്താവും പൊലീസില്‍ പരാതി നല്‍കി. ഒരു ബ്രീഡിംഗ് ഫാമില്‍ നിന്നുള്ള സിയാമീസ് ഇനത്തില്‍ പെട്ട മുതലയാണിതെന്നും, കൊറിയര്‍ സര്‍വീസുകാര്‍ തെറ്റായ അഡ്രസില്‍ ഡെലിവര്‍ ചെയ്തതാണെന്നും പൊലീസ് അന്വേഷണത്തില്‍ പറയുന്നു. മുതലകളെ വളര്‍ത്തുന്നത് ചൈനയില്‍ നിയമപരമാണ്. ലെതറിനും മാംസത്തിനും വേണ്ടിയാണ് സിയാമീസ് മുതലകളെ വളര്‍ത്തുന്നതെന്ന് സൗത്ത് ചൈന മോര്‍ണിംഗ് പോസ്റ്റ് റിപ്പോര്‍ട്ട് ചെയ്യുന്നു. ജീവനോടെയാണ് മുതലക്കുഞ്ഞിനെ അയച്ചിരിക്കുന്നത്.
എന്നാല്‍ സമയത്തിന് മുന്‍പ് ഡെലിവര്‍ ചെയ്യാന്‍ സാധിക്കാത്തതിനാല്‍ ഇവയുടെ ജീവന്‍ പൊലിയുകയും ചെയ്തു. ശുദ്ധജലത്തില്‍ വളരുന്ന വലിപ്പം കുറഞ്ഞ ഇനത്തില്‍ പെട്ട മുതലകളാണ് സിയാമീസ് മുതലകള്‍.
https://www.facebook.com/Malayalivartha
