ഓണത്തിന് ഇനി ഒരുമാസം; വിപണി സജീവമാകുന്നു
ഓണത്തിന് ഒരു മാസം കൂടി അവശേഷിക്കെ ഓണ വിപണി സജീവമാകുന്നു. കേരളത്തില്‍ ഏറ്റവുമധികം ബിസിനസ് നടക്കുന്ന സമയമാണ് മലയാളികളുടെ സ്വന്തം ഉത്സവമായ ഓണം. മഴ മാറി മാനം തെളിയുന്നതോടെ വിപണി കൂടുതല്‍ സജീവമാകും. എല്ലാ ഇനങ്ങളുടെയും വില്പനയില്‍ ശരാശരി 30 ശതമാനം വര്‍ദ്ധനയാണ് ഇത്തവണ പ്രതീക്ഷിക്കുന്നത്. ഇന്ത്യയൊട്ടാകെ ഉത്സവ സീസണിന് തുടക്കം കുറിക്കുന്നത് ഓണത്തിന്റെ വരവോടെയാണ്. അതുകൊണ്ടുതന്നെ കേരളത്തിലെ കച്ചവടം കമ്പനികള്‍ പ്രതീക്ഷയോടെയാണ് നോക്കുന്നത്. അതിനാല്‍ അന്താരാഷ്ട്ര കമ്പനികളെല്ലാം അവരുടെ ഏറ്റവും പുതിയ ഉത്പന്നങ്ങളും ഓഫറുകളുമായി വിപണിയില്‍ എത്തിക്കഴിഞ്ഞു. സ്വര്‍ണ നാണയങ്ങള്‍ മുതല്‍ വിദേശ യാത്രകള്‍ വരെയാണ് കമ്പനികള്‍ ഓഫര്‍ ചെയ്യുന്നത്.
വസ്ത്രം, ഗൃഹോപകരണങ്ങള്‍, മൊബൈല്‍ ഫോണുകള്‍, വാഹനങ്ങള്‍ തുടങ്ങി എന്തും ഏറ്റവുമധികം വില്‍ക്കുന്നത് ഓണക്കാലത്താണ്. ഇക്കഴിഞ്ഞ വേനല്‍ക്കാലത്ത് കേരളത്തില്‍ എ.സി. വില്പനയില്‍ വന്‍ കുതിപ്പുണ്ടായെന്നാണ് കണക്കുകള്‍ സൂചിപ്പിക്കുന്നത്. ഈ പ്രവണത തുടര്‍ന്നാല്‍ ഓണകച്ചവടത്തില്‍ വന്‍കുതിപ്പ് ഉണ്ടായേക്കും. ഗൃഹോപകരണ വിപണിയില്‍ 4കെ ടി.വി., കൂടുതല്‍ സൗകര്യങ്ങളുള്ള വാഷിങ് മെഷീന്‍ പുതിയ ഫീച്ചറുകളോടെയുള്ള റഫ്രിജറേറ്റര്‍ എന്നിവയാണ് ഇത്തവണത്തെ താരങ്ങള്‍. ആകര്‍ഷകമായ വായ്പാ സൗകര്യവും കമ്പനികള്‍ ഒരുക്കിയിട്ടുണ്ട്.
കുറഞ്ഞ വൈദ്യുത ഉപയോഗം, പരിസ്ഥിതി സൗഹൃദ പ്രത്യേകതകള്‍ തുടങ്ങിയവയെല്ലാം ഉപഭോക്താക്കള്‍ പരിഗണിക്കുന്നുണ്ട്. ഉയര്‍ന്ന ടെക്‌നോളജിയെ ആശ്രയിക്കുമ്പോള്‍ത്തന്നെ ഗുണമേന്മ ഉറപ്പാക്കാനും അവര്‍ ശ്രദ്ധിക്കുന്നു. മുന്‍കാലങ്ങളില്‍ നിന്ന് വ്യത്യസ്തമായി ഓരോ ഉത്പന്നത്തെക്കുറിച്ചും കൃത്യമായ അറിവോടെയാണ് ഉപഭോക്താക്കള്‍ എത്തുന്നത്. ഓണ്‍ലൈനിനെക്കാളുപരി സാധനങ്ങള്‍ കടകളില്‍ നിന്ന് നേരിട്ട് വാങ്ങാനാണ് ഇപ്പോഴും ബഹുഭൂരിപക്ഷം ആളുകള്‍ക്കും താത്പര്യം. ഓരോ സാധനവും നേരിട്ടുകണ്ട് വാങ്ങാമെന്നതാണ് ഗുണം. ഡീലര്‍മാരുമായുള്ള ബന്ധം, മികച്ച വില്പനാനന്തര സേവനം തുടങ്ങിയ കാരണങ്ങളുമുണ്ട്
https://www.facebook.com/Malayalivartha
