സെഡാന്‍ ശ്രേണിയില്‍ മെഴ്‌സിഡെസ് ബെന്‍സ് ഒരുക്കിയ പുതിയമുഖം സി.എല്‍.എ ക്‌ളാസ് 2015 കേരള വിപണിയിലെത്തി. സ്‌പോര്‍ട്ടി ലക്ഷ്വറിക്കും ഡിസൈനിംഗിനും പുതിയമാനം നല്‍കുന്ന സി.എല്‍.എ ക്‌ളാസ് 2015 കൊച്ചി ലുലുമാളില്‍ നടന്ന ചടങ്ങില്‍ രാജശ്രീ മോട്ടോഴ്‌സ് മാനേജിംഗ് ഡയറക്ടര്‍ എസ്. ശിവകുമാര്‍ വിപണിയില്‍ അവതരിപ്പിച്ചു.
ആകര്‍ഷകമായ രൂപകല്പനയ്ക്ക് പുറമേ മികച്ച പെര്‍ഫോമന്‍സും സി.എല്‍.എ ക്‌ളാസിന് മുതല്‍ക്കൂട്ടാകുന്നു. പൂജ്യത്തില്‍ നിന്ന് നൂറ് കിലോമീറ്റര്‍ വേഗം കൈവരിക്കാന്‍ വെറും 7.8 സെക്കന്‍ഡ് മതി. ഇന്ത്യന്‍ റോഡുകള്‍ക്ക് അനുയോജ്യമായ ഉയര്‍ന്ന ഗ്രൗണ്ട് ക്‌ളിയറന്‍സും ഉയര്‍ന്ന സീറ്റിംഗ് സംവിധാനവും മികവാണ്. ആഡംബരവും സ്‌പോര്‍ട്ടി ലുക്കും നിറയുകയാണ് അകത്തളത്തിലും. മള്‍ട്ടിമീഡിയ ഇന്‍ഫോടെയ്ന്‍മെന്റ്, ബെന്‍സ് റേഡിയോ, നാവിഗേഷന്‍, അത്യാധുനിക മ്യൂസിക് സംവിധാനം തുടങ്ങിയവയും അകത്തളത്തിന്റെ സവിശേഷതയാണ്.
പെട്രോള്‍, ഡീസല്‍ വേരിയന്റുകളുണ്ട്. ഡീസല്‍ എന്‍ജിന്‍ ലിറ്ററിന് 17.9 കിലോമീറ്റര്‍ മൈലേജ് നല്‍കും. 7 സ്പീഡ് ഓട്ടോമാറ്റിക് ഗിയര്‍ സംവിധാനമാണുള്ളത്. 32.14 ലക്ഷം രൂപ മുതല്‍ 36.63 ലക്ഷം രൂപ വരെയാണ് എക്‌സ്‌ഷോറൂം വില.