റിലയന്‍സ് ജിയോ പുറത്തിറക്കുന്ന 4ജി വോള്‍ട്ട് ഫോണിനെ കുറിച്ച് പല സംശയങ്ങളും നിലനില്‍ക്കുന്നുണ്ട്. എറെപ്പേരും ഉറ്റുനോക്കുന്നത് ജിയോ പുറത്തിറക്കുന്ന 4ജി വോള്‍ട്ട് ഫോണില്‍ വാട്‌സ്ആപ്പ്, യൂട്യൂബ്, ഫേസ്ബുക്ക് തുടങ്ങിയ സോഷ്യല്‍ മീഡിയ ആപ്ലിക്കേഷനന്‍ ലഭിക്കുമോ എന്നാണ്. റിലയന്‍സ് ജിയോ ഫോണില്‍ വാട്‌സ്ആപ്പ് ലഭ്യമാകില്ലെന്നാണ് യൂട്യൂബര്‍ ടെക്‌നിക്കല്‍ ഗുരുജി റിപ്പോര്‍ട്ട് ചെയ്യുന്നത്.

എന്നാല്‍ ഫീച്ചര്‍ ഫോണില്‍ ഫേസ്ബുക്കും യൂട്യൂബും ലഭ്യമാകുമെന്നും വെബ്‌സൈറ്റ് റിപ്പോര്‍ട്ട് ചെയ്യുന്നു. ഓഗസ്റ്റ് 24 മുതലാണ് ഫോണിനുള്ള ബുക്കിംഗ് ആരംഭിക്കുന്നത്. ആദ്യം ബുക്ക് ചെയ്യുന്ന ക്രമത്തിലായിരിക്കും ഫോണ്‍ വിതരണം ആരംഭിക്കുകയെന്നും 36 മാസത്തെ ഉപയോഗത്തിന് ശേഷം സെക്യൂരിറ്റിയായി നിക്ഷേപിച്ച തുക ഉപയോക്താക്കള്‍ക്ക് തിരിച്ചുനല്‍കുമെന്നും അംബാനി പ്രഖ്യാപനത്തിനിടെ വ്യക്തമാക്കിയിരുന്നു.

പ്രതിദിനം 500 എംബി ഡാറ്റയ്ക്ക് പുറമേ ഫോണിനൊപ്പം ജിയോ ധന്‍ ധനാ ധന്‍ ഓഫര്‍ പ്രകാരം പ്രതിമാസം വെറും 153 രൂപാ റീച്ചാര്‍ജ്ജില്‍ അണ്‍ലിമിറ്റഡ് ഡാറ്റ, വോയ്‌സ് കോള്‍, എസ്എംഎസ് എന്നിവ സൗജന്യമായി ലഭിക്കും. ഓരോ മാസവും 50 ലക്ഷം ഫോണുകള്‍ നിര്‍മിക്കാനാണ് കമ്പനി ലക്ഷ്യമിടുന്നതെന്ന് മുകേഷ് അംബാനി പ്രഖ്യാപനത്തിനിടെ വ്യക്തമാക്കിയിരുന്നു. 1500 രൂപ ഡെപ്പോസിറ്റില്‍ രാജ്യത്ത് 4ജി ഫീച്ചര്‍ ഫോണ്‍ പുറത്തിറങ്ങുന്നതോടെ രാജ്യത്ത് ഇന്റര്‍നെറ്റ് ഉപയോഗിക്കുന്നവരുടെ എണ്ണവും കുത്തനെ വര്‍ധിക്കുമെന്നാണ് കണക്കുകൂട്ടല്‍.