സ്വാതന്ത്യദിനാഘോഷത്തിന്റെ ഭാഗമായി മെഴ്‌സിഡീസ് ബെന്‍സ് ജിഎല്‍സി സെലിബ്രേഷന്‍ എഡിഷനെ ഇന്ത്യയിലവതരിപ്പിച്ചു. പെട്രോള്‍, ഡീസല്‍ വകഭേദങ്ങളിലാണ് സെലിബ്രേഷന്‍ എഡിഷനെ വിപണിയിലെത്തിച്ചിരിക്കുന്നത്. ഡല്‍ഹി എക്‌സ്‌ഷോറൂം 50.86 ലക്ഷമാണ് ജിഎല്‍സി 220d സെലിബ്രേഷന്‍ എഡിഷന്റെ വില.

വാഹനത്തിന്റെ പുറമെയും അകത്തളത്തിലുമായി ചില്ലറ മിനുക്കുപണികളോടെയാണ് സെലിബ്രേഷന്‍ എഡിഷന്‍ എത്തിയിരിക്കുന്നത്. എല്‍ഇഡി ലോഗോ പ്രൊജക്ടര്‍, ഗാര്‍മിന്‍ map pilot, ഹൈ ഗ്ലോസ് ബ്ലാക്കിലുള്ള എക്‌സ്റ്റീരിയര്‍ മിറര്‍ ഹൗസിംങ്, സ്‌പോര്‍ട്‌സ് പെഡലുകള്‍ എന്നിങ്ങനെ ഒരുപിടി പുതുമകള്‍ ഈ എസ് യു വിയില്‍ ഉള്‍ക്കൊള്ളിച്ചിട്ടുണ്ട്. കോസ്‌മെറ്റിക് പരിവര്‍ത്തനങ്ങള്‍ അല്ലാതെ മെക്കാനിക്കല്‍ സംബന്ധിച്ച മാറ്റങ്ങളൊന്നും നടത്തിയിട്ടില്ല. അതെ 2.0ലിറ്റര്‍ ഫോര്‍ സിലിണ്ടര്‍ ടര്‍ബോ പെട്രോള്‍ എന്‍ജിനും, 2.1 ലിറ്റര്‍ ഫോര്‍-സിലിണ്ടര്‍ എന്‍ജിനുമാണ് സെലിബ്രേഷന്‍ എഡിഷന് കരുത്തേകുന്നത്.

245 ബിഎച്ച്പിയും 370 ടോര്‍ക്കും നല്‍കുന്നതാണ് ഇതിലെ പെട്രോള്‍ എന്‍ജിന്‍. 170 ബിഎച്ച്പിയും 400 എന്‍എം ടോര്‍ക്കുമാണ് ഡീസല്‍ എന്‍ജിന്‍ സൃഷ്ടിക്കുന്നത്. 9 സ്പീഡ് ഓട്ടോമാറ്റിക് ഗിയര്‍ ബോക്‌സാണ് ഇരുവകഭേദങ്ങളിലും ട്രാന്‍സ്മിഷന്‍ ചുമതല നിര്‍വഹിക്കുന്നത്. മെര്‍സിഡീസിന്റെ എസ് യുവി നിരയില്‍ ഏറ്റവും കരുത്തേറിയൊരു വാഹനമാണ് ജിഎല്‍സി. സെലിബ്രേഷന്‍ എഡിഷനിലൂടെ ജിഎല്‍സിയുടെ പ്രചാരം വര്‍ധിപ്പിക്കുക എന്നതാണ് കമ്പനി ലക്ഷ്യമിടുന്നത്.