ഏതൊക്കെ ബൈക്ക് വിപണിയിലെത്തിയാലും ബുള്ളറ്റിന്റെ രാജകല ഒന്ന് വേറെ തന്നെയാണ്. ബൈക്ക് എന്നാല്‍ ബുള്ളറ്റ് തന്നെ, അത് പഴയ തലമുറയായാലും ന്യൂ ജെന്‍ ആയാലും. ആ എടുപ്പിനും ചന്തത്തിനും മാറ്റ് കൂട്ടുന്നത് വാഹനം വരുമ്പോഴുള്ള പ്രത്യേക സൗണ്ടാണ്. കുറച്ചു ദൂരെ വാഹനം എത്തുമ്പോഴേക്ക് ബുള്ളറ്റാണ് വരുന്നതെന്ന് കൊച്ചുകുട്ടികള്‍ പോലും വിളിച്ചുപറയും. ശരിക്കും ബൈക്കിന്റെ ഒരു സിഗ്‌നേച്ചര്‍ ടോണ്‍ കൂടിയാണ് ബുള്ളറ്റ് പുറപ്പെടുവിക്കുന്ന ആ സുപരിചിത ശബ്ദം.

2030 ഓടെ പൂര്‍ണ്ണമായും ഒരു ഇലക്ട്രിക്ക് ബൈക്കായി മാറാനുള്ള തയ്യാറെടുപ്പിലാണ് ഇപ്പോള്‍ ബുള്ളറ്റ്. അതിന്റെ മുന്നോടിയായി ഇലക്ട്രിക്ക് മോട്ടോര്‍ ഘടിപ്പിക്കുകയാണ് പുതിയ ബുള്ളറ്റുകളില്‍. വാഹനങ്ങളുടെ ശബ്ദമലിനീകരണം കുറക്കുന്നതിനുള്ള സര്‍ക്കാര്‍ നീക്കങ്ങളോട് സഹകരിച്ചുകൊണ്ടാണ് റോയല്‍ എന്‍ഫീല്‍ഡ് മനസില്ലാ മനസോടെ ഈ മാറ്റം വരുത്താന്‍ ഒരുമ്പെടുന്നത്. അതോടെ കുറഞ്ഞ ശബ്ദത്തിലായിരിക്കും ബുള്ളറ്റ് ഇനി റോഡുകളില്‍ എത്തുക. പഴയ ബുള്ളറ്റിന്റെ പ്രൗഢിയും ഭാരവും പുതിയ മോഡലുകള്‍ക്കില്ലെന്ന പരാതി അല്ലെങ്കില്‍ തന്നെയുണ്ട്. അതുകൊണ്ട് ഏറെ പഴക്കം ചെന്ന ബുള്ളറ്റ്, അതും മിലിറ്ററി ബുള്ളറ്റ് തന്നെ, നല്ല വില കൊടുത്ത വാങ്ങാന്‍ തയാറാകുന്ന ധാരാളം പേരുണ്ട്.

ഇനി ചിരപരിചിതമായ ആ ശബ്ദവും ബുള്ളറ്റിനു അന്യമാകാന്‍ പോവുകയാണ്. മുന്‍ കാലങ്ങളില്‍ ഈ പ്രത്യേക സൗണ്ടിനു വേണ്ടി കാസ്റ്റ് അയേണ്‍ കൊണ്ടാണ് എക്‌സാസ്റ്റ് നിര്‍മിച്ചിരുന്നത്. പിന്നീട് ഇത് അലുമിനിയം കൊണ്ടയപ്പോള്‍ ശബ്ദം നല്ല തോതില്‍ കുറഞ്ഞു, പഴയ ആ ഗാംഭീര്യം നഷ്ടമായെന്ന് പറയാം. ഇലക്ട്രിക്ക് ആകുമ്പോള്‍ ശബ്ദം നേര്‍ത്ത തോതിലായി മാറും. ബുള്ളറ്റ് നിര്‍മാതാക്കളായ ഐഷര്‍ ഈയിടെ രണ്ടു പുതിയ മോഡലുകള്‍ കൂടി വിപണിയില്‍ അവതരിപ്പിച്ചിരുന്നു. 650 സിസി ഉള്ള ഇന്റര്‍സെപ്റ്റര്‍, കോണ്ടിനെന്റല്‍ ജി ടി എന്നീ മോഡലുകളാണ് അവതരിപ്പിച്ചിരിക്കുന്നത്.

ഏപ്രിലില്‍ ഇവ യൂറോപ്യന്‍ വിപണിയില്‍ ലോഞ്ച് ചെയ്യും. ഇന്ത്യന്‍ നിര്‍മിത ബൈക്കുകകളില്‍ എക്‌സ്‌പോര്‍ട് മാര്‍ക്കറ്റുകളില്‍ ഏറെ പ്രിയപ്പെട്ട ബൈക്ക് ബുള്ളറ്റാണ്. ബൈക്ക് വിപണിയില്‍ മത്സരം കടുക്കുകയാണ്. പ്രമുഖ ഇരു ചക്ര വാഹന നിര്‍മാതാക്കളായ ബജാജ് 2020 ല്‍ ഇലക്ട്രിക്ക് ബൈക്കുകള്‍ വിപണിയിലെത്തിക്കുകയാണ്. ഏതാനും പുതിയ കമ്പനികള്‍ ബാറ്ററിയില്‍ ഓടുന്ന ബൈക്കുകള്‍ അവതരിപ്പിക്കാന്‍ ഒരുങ്ങുകയാണ്.