" ആനയെ പോറ്റുന്നത് നിര്‍ത്തൂ " ; വീണ്ടും ബുള്ളറ്റിനെ ആനയോടുപമിച്ച് ബജാജിന്റെ പരസ്യം
വാഹന രംഗത്ത് നിര്‍മ്മാതാക്കള്‍ തമ്മില്‍ മത്സരം പതിവാണ്. ഒരു കമ്പനി പുതിയ മോഡലിറക്കിയാല്‍ അതിനെ വെല്ലുന്ന അല്ലെങ്കില്‍ അതേ മോഡല്‍ വാഹനം ഇറക്കിയാണ് മത്സരം മുറുക്കുന്നത്.
റോയല്‍ എന്‍ഫീല്‍ഡിനെ കളിയാക്കി നേരത്തെ പൊങ്കാലകള്‍ ഏറ്റുവാങ്ങിയ ബജാജ് വീണ്ടും പരസ്യവുമായി എത്തിയിരിക്കുകയാണ്. ഇത്തവണ ഒന്നല്ല, മൂന്ന് പരസ്യങ്ങളാണ് ബുള്ളറ്റിനെ കളിയാക്കാനായി പുറത്തിറക്കിയിരിക്കുന്നത്. ബുള്ളറ്റ് കൈകാര്യം ചെയ്യാനുള്ള പ്രയാസവും ബ്രേക്കിലെ പോരായ്മയും രാവിലെ സ്റ്റാര്‍ട്ടാകാനുള്ള ബുദ്ധിമുട്ടുമാണ് പരസ്യത്തിലെ വിഷയങ്ങള്‍.
മൂന്ന് അവസരത്തിലും ബജാജ് ഡോമിനാര്‍ എങ്ങനെ പെരുമാറുമെന്നും പരസ്യത്തില്‍ കാണാം.ആനകളെയാണ് ഇത്തവണയും ബുള്ളറ്റിനെ സൂചിപ്പിക്കാനായി ഉപയോഗിച്ചിരിക്കുന്നത്.
ബജാജ് നിരയിലെ ഏറ്റവും കരുത്തുറ്റ പുതിയ ഡോമിനാറിനായി ഒരുക്കിയ പരസ്യത്തിലാണ് ഇന്ത്യന്‍ നിര്‍മ്മാതാക്കളായ ബജാജ് പരോക്ഷമായി റോയല്‍ എന്‍ഫീല്‍ഡ് ബൈക്കുകളെ കളിയാക്കിയത്. ബുള്ളറ്റിന്റെ ഐക്കണിക് എന്‍ജിന്‍ ശബ്ദം അതേപടി പകര്‍ത്തിയാണ് ഇത്തവണയും ചിത്രീകരിച്ചിരിക്കുന്നത്.
ആനയുടെ തലയെടുപ്പിലും ലുക്കിലും നിവര്‍ന്നിരിക്കുന്ന യാത്രക്കാര്‍. പശ്ചാത്തലത്തില്‍ എന്‍ഫീല്‍ഡിന്റെ കുടുകുടു ശബ്ദം. കയറ്റത്തിലും വളവുകളിലും തളര്‍ന്നു നില്‍ക്കുന്ന ആനകള്‍ക്കിടയിലൂടെ ഡോമിനാര്‍ അനായാസമായി കയറി പോകുന്നു. ഇത് ആരാധകരെ ചൊടിപ്പിച്ചു കഴിഞ്ഞു.
മുൻപും ഇത്തരത്തിലുള്ള പരസ്യങ്ങൾ ഇറക്കിയിരുന്നുവെങ്കിൽ പോലും എന്‍ഫീല്‍ഡിനെ വെല്ലാന്‍ പറ്റുന്ന മാര്‍ക്കറ്റ് ഇതുവരെ ഡോമിനാറിന് ലഭിച്ചിട്ടില്ല.
https://www.facebook.com/Malayalivartha
