റിലയന്‍സ് ജിയോയുടെ പ്രൈം അംഗത്വ ആനുകൂല്യങ്ങള്‍ സൗജന്യമായി അടുത്ത ഒരു വര്‍ഷത്തേക്ക് കൂടി നീട്ടിയാതായി റിപ്പോർട്ടുകൾ. നിലവില്‍ ജിയോ പ്രൈം അംഗത്വമുള്ള ഉപയോക്താക്കള്‍ക്കാണ് പുതിയ സേവനം ലഭ്യമാക്കുകയെന്നും ഇവര്‍ പുതിയ സേവനങ്ങള്‍ക്ക് അധിക പണം നല്‍കേണ്ടതില്ലെന്നുമാണ് ജിയോയുടെ തീരുമാനം.

മാർച്ച് 31 നു അവസാനിക്കുമായിരുന്ന പ്രൈം അംഗത്വ കാലാവധിയാണ് തുക ഒട്ടും കൂട്ടാതെ ജിയോ നീട്ടി നല്‍കിയത്. 2019 മാര്‍ച്ച് 31 വരെയാണ് പുതിയ കാലാവധി.

അതേസമയം പുതിയ ആളുകള്‍ക്ക് ഏപ്രില്‍ ഒന്നിന് ശേഷമാണ് പ്രൈം അംഗത്വമെടുക്കാന്‍ സാധിക്കുക. അടുത്ത ഒരു വര്‍ഷത്തേക്ക് നിലവിലുള്ള റിലയന്‍സ് ജിയോ ഉപയോക്താക്കള്‍ക്ക് പ്രൈം അംഗത്വം നേടണമെങ്കില്‍ മൈജിയോ ആപ്പ് വഴി നിങ്ങളുടെ താല്‍പര്യം അറിയിക്കണം. ഇതിനായി ഉപയോക്താക്കള്‍ മൈജിയോ ആപ്പ് സൈന്‍ ഇന്‍ ചെയ്ത് തുറന്നാല്‍ അവിടെ ഓട്ടോമാറ്റിക് ആയി ഓഫര്‍ പുതുക്കുമെന്ന സന്ദേശം കാണാം. 99 രൂപയാണ് ജിയോ പ്രൈം അംഗത്വ ചാര്‍ജ്ജ്.

സാധാരണ ഉപഭോക്താക്കൾക്ക് നൽകിയിരുന്നതിനേക്കാൾ കൂടുതൽ ഇളവുകളും ഓഫറുകളുമാണ് ജിയോ പ്രൈം അംഗങ്ങൾക്ക് നല്‍കിയിരുന്നത്. പദ്ധതി തുടങ്ങി 180 ദിവസത്തിനുള്ളിൽ 99 രൂപ നല്‍കി 10 കോടി ഉപഭോക്താക്കൾ പ്രൈം അംഗത്വമെടുത്തിരുന്നു. നിലവിൽ 16.5 കോടിയാണ് ജിയോ വരിക്കാർ.