ഗൂഗിളിന്റെ ആൻഡ്രോയ് ഓപ്പറേറ്റിങ് സിസ്റ്റത്തിന്റെ ലൈറ്റ് വേർഷനായ ആൻഡ്രോയ്ഡ് ഗോയിൽ പ്രവർത്തിക്കുന്ന നോക്കിയയുടെ ഏറ്റവും പുതിയ ഫോൺ നോക്കിയ 1 ഇന്ത്യന്‍ വിപണിയില്‍ അവതരിപ്പിച്ചതായി റിപ്പോർട്ടുകൾ.

5,500 രൂപ വിലയുള്ള നോക്കിയ 1 ഇന്ത്യയില്‍ പുറത്തിറങ്ങുന്ന രണ്ടാമത്തെ ആന്‍ഡ്രോയ്ഡ് (ഓറിയോ) ഗോ ഫോണ്‍ ആണ്. ആൻഡ്രോയ്ഡ് ഗോ ഓപ്പറേറ്റിങ് സിസ്റ്റത്തോടൊപ്പം ഗോ ആപ്പുകൾ കൂടിയാവുമ്പോൾ കുറഞ്ഞ റാം ശേഷിയിലും ഫോൺ നന്നായി പ്രവർത്തിക്കും.

നാലു കോറുള്ള മീഡിയടെക് MT6737M പ്രൊസസറാണ് ഈ ഫോണിനുള്ളത്. 1GB റാമും ഉണ്ട്. കൈയ്യില്‍ ഒതുങ്ങുന്ന, 4.5-ഇഞ്ച് വലിപ്പമാണ് വലിയ 'ഡെക്കറേഷന്‍സ്' ഒന്നുമില്ലാത്ത ഈ മോഡലിനുള്ളത്. ആന്‍ഡ്രോയിഡ് 8 ഓപ്പറേറ്റിങ് സിസ്റ്റത്തിൽ പ്രവർത്തിക്കുന്ന ഫോണിന് 5 MP പിന്‍ക്യാമറയ്ക്ക് എല്‍ഇഡി ഫ്‌ളാഷും ഉണ്ട്. 2MP യാണ് മുന്‍ക്യാമറ.

സാധാരണ ആളുകള്‍ ഫോണില്‍ നിന്നു പ്രതീക്ഷിക്കുന്ന എല്ലാ ഫീച്ചറും ഉള്‍ക്കൊള്ളുന്നതാണ് പുതിയ നോക്കിയ സ്മാർട്ഫോൺ. 8GB സറ്റോറേജ് എന്നത് ചിലര്‍ക്ക് ഒരു പരിമിതിയായിരിക്കാം. എന്നാൽ 128GB വരെയുള്ള മൈക്രോഎസ്ഡി കാര്‍ഡുകള്‍ സ്വീകരിക്കും.