ആഗോളതലത്തില്‍ അറുപത് ലക്ഷം ഫോണുകളുടെ വില്‍പന നടത്തിയെന്ന അവകാശവാദവുമായി ചൈനയിലെ പ്രമുഖ സ്മാര്‍ട്‌ഫോണ്‍, ടെലികം എക്യുപ്‌മെന്റ് കമ്പനിയായ വാവെയ് രംഗത്തെത്തിയിരിക്കുകയാണ്. ഈ വർഷം മാർച്ചിൽ പുറത്തിറക്കിയ കമ്പനിയുടെ സ്മാര്‍ട്ട്‌ഫോണുകളില്‍ ശ്രദ്ധേയ മോഡലായ പി20 യുടെ വിലപ്നയാണ് 60 ലക്ഷം യൂണിറ്റുകള്‍ കഴിഞ്ഞത്.

ബുധനാഴ്ച്ച ഷാങ്ഹായിലാണ് കമ്പനി ഈ വിവരം പുറത്തുവിട്ടത്. വാവേ​യുടെ തന്നെ പി10 പരമ്പരയിലെ ഫോണുകളെക്കാള്‍ 81 ശതമാനം വിപണിയിലെ പ്രകടനമാണ് പി20 ഫോണുകള്‍ക്ക് കമ്പനി അവകാശപ്പെടുന്നത്.

അവിശ്വസനീയമായ ഈ സ്വീകാര്യതയും വില്‍പനയും തെളിയിക്കുന്നത് പുതുമയിലും പുതിയ സാങ്കതികവിദ്യകള്‍ അവതരിപ്പിക്കുന്നതിലുമുള്ള തങ്ങളുടെ പ്രതിബദ്ധതയാണെന്ന് വാവേ​യുടെ ഹാന്‍ഡ്‌സെറ്റ് പ്രൊഡക്ഷന്‍ ലൈന്‍ പ്രസിഡന്റ് കെവിന്‍ ഹോ വ്യക്തമാക്കി.

ലോകത്ത് ആദ്യമായി ആര്‍ട്ടിഫിഷ്യല്‍ ഇന്റലിജന്‍സിന്റെ സഹായത്തില്‍ പ്രവര്‍ത്തിക്കുന്ന ട്രിപ്പിള്‍ റിയര്‍ ക്യാമറയുള്ള പി20 പ്രോ, പി20 ലൈറ്റ് എന്നീ ഫോണുകളാണ് ഈ സീരീസിൽ ഉള്‍കൊള്ളിച്ചിരിക്കുന്നത്.

64999 രൂപ വില വരുന്ന പി20 പ്രോ ലോകത്ത് ആദ്യമായി ലൈക്കാ ട്രിപ്പിള്‍ റിയര്‍ ക്യാമറയോട് കൂടിയാണ് വാവേ​ പുറത്തിറക്കിയിരിക്കുന്നത്. 40 എംപിയുടെ ആര്‍.ജി.ബി സെന്‍സറും 20 എം.പിയുടെ മോണോക്രോം സെന്‍സറും 8 എം.പിയുടെ സെന്‍സറുമാണ് ക്യാമറയില്‍. ഷാര്‍പ്പ്‌നെസ്സിനും കളര്‍ അക്വറസിക്കും ഫോക്കസിനും കോണ്‍ട്രാസ്റ്റിനുമായി ടെലിഫോട്ടോ ലെന്‍സും ക്യാമറയിലുണ്ട്.

ലോങ്ങ് റേഞ്ച് ഫോട്ടോഗ്രാഫിക്കായി 5 എക്‌സ് ഹൈബ്രിഡ്ജ് സൂമും ആറ് ആക്‌സിസ് സ്റ്റെബിലൈസേഷന്‍ സപ്പോര്‍ട്ടും 960 എഫ്.പി.എസ് സൂപ്പര്‍ സ്ലോമോഷനും ആണ് ക്യാമറയുടെ മറ്റൊരു പ്രത്യേകത. സ്‌ക്രീന്‍ 15.49 സെന്റീമീറ്റര്‍ ഓ.എല്‍.ഇ.ഡി ആണ്. 4000 എം.എ.എച്ച് ആണ് ബാറ്ററി ലൈഫ്.