സംസ്ഥാനത്തെ സഹകരണ ബാങ്കുകളിലെ ജൂനിയര്‍ ക്ലാര്‍ക്ക്, സെക്രട്ടറി, ടൈപ്പിസ്റ്റ് എന്നീ തസ്തികകളിലേക്കുള്ള വിജ്ഞാപനം ഉടന്‍ പ്രസിദ്ധീകരിക്കുമെന്ന് സഹകരണ സര്‍വ്വീസ് പരീക്ഷാ ബോര്‍ഡ് ചെയര്‍മാന്‍ അഡ്വ. ആര്‍.വി. സതീന്ദ്രകുമാര്‍ പ്രഖ്യാപിച്ചു. 2016 ലെ വിജ്ഞാപനത്തിന്റെ അടിസ്ഥാനത്തിലുള്ള പരീക്ഷകള്‍ ഏപ്രില്‍ 8 ന് നടക്കാനിരിക്കുകയാണ്. ഇതു കഴിഞ്ഞാലുടന്‍തന്നെ അടുത്ത വിജ്ഞാപനം ഉണ്ടാകും. സഹകരണ സര്‍വീസ് പരീക്ഷാബോര്‍ഡ് സമാന തസ്തികകളിലേക്ക് വിജ്ഞാപനം പുറപ്പെടുവിച്ചത് 2016 ജനുവരി എട്ടിനായിരുന്നു. നിലവില്‍ 400 ലധികം ഒഴിവുകളുണ്ട്. ഏപ്രില്‍ പകുതിയോടെ വിജ്ഞാപനം പ്രസിദ്ധീകരിച്ച് ഈ വര്‍ഷം അവസാനത്തോടെ പരീക്ഷകള്‍ നടത്താനാകുമെന്നാണ് സഹകരണ സര്‍വീസ് പരീക്ഷാബോര്‍ഡിന്റെ നിഗമനം.