കഴിഞ്ഞ വർഷം കേരളക്കരയെ ഒന്നാകെ ഭീതിയിലാഴ്ത്തിയ ഒന്നാണ് നിപ ബാധ . ആദ്യം എല്ലാവരും ഒന്ന് ഞെട്ടിയെങ്കിലും, പിന്നീട് അതിനെ എല്ലാവരും ഒന്നാകെ അതിജീവിച്ചു . നാട്ടുകാരോടൊപ്പം ഡോക്ടർമാരും ആരോഗ്യ വകുപ്പും കൈകോർത്തു. ഇതിന്റെ അടിസ്ഥാനത്തിൽ പുറത്തിറങ്ങിയ ചിത്രമാണ് കഴിഞ്ഞ മാസം പുറത്തിറങ്ങിയ വൈറസ് . ചിത്രം വിജയകരമായി ജൈത്രയാത്ര പുരോഗമിക്കുകയാണ്. മികച്ച പ്രതികരണമാണ് ചിത്രത്തിന് ലഭിക്കുന്നത്. ചിത്രത്തിലെ ഓരോ കഥാപാത്രങ്ങളെയും വളരെ റിയാലിസ്റ്റിക്ക് ആയിട്ടാണ് അവതരിപ്പിച്ചിരിക്കുന്നത്. എന്നാലിപ്പോൾ, ചിത്രത്തിൽ കടപ്പാട് വെയ്ക്കാതെ കോഴിക്കോട് ജില്ലയുടെ ഭൂപടം ഉപയോഗിച്ച സംഭവത്തില്‍ മാപ്പ് പറഞ്ഞ് സംവിധായകന്‍ ആഷിക്ക് അബുവും നിര്‍മ്മാതാവ് റിമ കല്ലിങ്കലും. തങ്ങളുടെ ഫേസ്ബുക്ക് പേജിലൂടെയാണ് ആഷിഖ് അബുവും റിമയും മാപ്പ് പറഞ്ഞു രംഗത്തെത്തിരയിരിക്കുന്നത്.

കോഴിക്കോട് കൂരാച്ചുണ്ട് പഞ്ചായത്തിലെ അസിസ്റ്റന്റ് സെക്രട്ടറി ആയിരുന്ന ജൈസണ്‍ നെടുമ്പാല നിര്‍മ്മിച്ച്‌ വിക്കിമീഡിയ കോമണ്‍സില്‍ ക്രിയേറ്റീവ് കോമണ്‍സ് ലൈസന്‍സ് പ്രകാരം പ്രസിദ്ധപ്പെടുത്തിയ ജില്ലയുടെ ഭൂപടം സിനിമയില്‍ കമ്പ്യൂട്ടർ ഗ്രാഫിക്സിലൂടെയാണ് കാണിച്ചിരിക്കുന്നത്. ഇതിന്റെ കടപ്പാടാണ് ഇവർ ചിത്രത്തിൽ വെക്കാതിരുന്നത്. തുടർന്ന് മാപ്പു പറഞ്ഞു രംഗത്തെത്തുകയായിരുന്നു .

വിക്കിമീഡീയ കോമണ്‍സിലുള്ള ചിത്രം ഉപയോഗിച്ചാണ് മാപിന്റെ കമ്പ്യൂട്ടർ ഗ്രാഫിക്സ് നിര്‍മ്മിച്ചതെന്നും ക്രിയേറ്റീവ് കോമണ്‍സ് ലൈസന്‍സിനെക്കുറിച്ചുള്ള ധാരണക്കുറവ് മൂലവുമാണ് ഈ പിഴവ് സംഭവിച്ചിട്ടുള്ളതെന്ന് റിമയും ആഷിക്കും പറയുന്നു. അതുകൊണ്ടുതന്നെ ജൈസണ്‍ നെടുമ്പാലയോട് ഹൃദയത്തിന്റെ ഭാഷയില്‍ ക്ഷമ ചോദിക്കുകയും ആ ചിത്രത്തിനുള്ള ആട്രിബ്യൂഷന്‍ അദ്ദേഹത്തിനാണെന്ന് അറിയിക്കുകയും ചെയ്യുന്നു എന്ന് ഇരുവരും ഫേസ്ബുക്കില്‍ കുറിച്ചു.

സ്വതന്ത്രമലയാളം കമ്പ്യൂട്ടിങ് പ്രവര്‍ത്തകനും വിക്കിപ്പീഡിയനുമാണ് ഇപ്പോള്‍ ചുങ്കത്തറ ഗ്രാമപ്പഞ്ചായത്ത് സെക്രട്ടറിയായ ജൈസണ്‍ നെടുമ്പാല . മാപ്പിങ് രംഗത്തും വിക്കിപ്പീഡിയ, മലയാളം കമ്ബ്യൂട്ടിങ് എന്നീ രംഗത്തും പ്രശസ്തനാണ് ജൈസണ്‍. 2018 ഡിസംബറില്‍ കമ്യൂണിറ്റി പങ്കാളിത്തത്തോടെ നടത്തിയ കൂരാച്ചുണ്ട് ഗ്രാമപ്പഞ്ചായത്തിന്റെ ഭൂപടനിര്‍മ്മിച്ച്‌ ജൈസണ്‍ ലോകശ്രദ്ധ പിടിച്ചു പറ്റിയിരുന്നു.