ഫേയ്ക്കന്മാര്‍ ജാഗ്രതൈ, ഒറിജിനല്‍ വന്നു' ഫേസ്ബുക്കില്‍ ഔദ്യോഗികമായി ഐഡി എടുത്ത വിവരം പങ്കുവെച്ച്‌ നടന്‍ ശ്രീനിവാസന്‍. തന്റെ പേരില്‍ സോഷ്യല്‍ മീഡിയയില്‍ നടക്കുന്ന വ്യാജപ്രചാരണങ്ങള്‍ കൂടി വന്നതിനെ തുടര്‍ന്നാണ് അദ്ദേഹം സ്വന്തമായി ഒരു അക്കൗണ്ട് തുടങ്ങിയത്. മകനും നടനുമായ വിനീതിനോട് സിപിഎമ്മില്‍ ചേരാന്‍ ആവശ്യപ്പെട്ടു എന്ന തരത്തില്‍ പ്രചരിക്കുന്ന വാര്‍ത്തകള്‍ തെറ്റാണെന്നാണ് ശ്രീനിവാസന്‍ പറയുന്നത് . ഫേസ്ബുക്കില്‍ തന്റെ പേരില്‍ ആറ് വ്യാജ അക്കൗണ്ടുകള്‍ ഉണ്ട്. ഇതിലൂടെയാണ് ഇത്തരത്തിലുള്ള പ്രചരണങ്ങള്‍ നടക്കുന്നത്. സിപിഎമ്മില്‍ ചേരാന്‍ മകനെ താന്‍ ഉപ​ദേശിച്ചു എന്നാണ് പ്രചരണം. പിന്നെ ചേരരുത് എന്നു പറഞ്ഞു പ്രചരണം നടന്നു. സിപിഎമ്മില്‍ ചേര്‍ന്നാല്‍ അതൊരു ചൂണ്ടയാണെന്നും പറഞ്ഞു പരത്തി. പ്രായമായ ഇവിടെ ജീവിക്കുന്നവര്‍ക്ക് ഏത് രാഷ്ട്രീയ പാര്‍ട്ടിയെക്കുറിച്ചും വ്യക്തമായ ധാരണയുണ്ടാവും. എന്നാല്‍ ഇന്നു വരെ മകനോട്ട് ഇങ്ങനെ ഒരു ഉപദേശം കൊടുത്തിട്ടില്ല. ഈ പ്രചരണം തെറ്റാണ്. മകനല്ല ആരെയും ഉപദേശിക്കാന്‍ താന്‍ തയ്യാറല്ല. ലോകത്തിലെ ഏറ്റവും വൃത്തികെട്ട പരിപാടിയാണ് ഉപദേശം. എന്നാല്‍ എന്നെപ്പറ്റി ഫേക്കായി ഫേസ്ബുക്കില്‍ എഴുതുന്നവര്‍ക്ക് അക്കാര്യം അറിയില്ലായിരിക്കും. അതുകൊണ്ടാണ് ഇപ്പോള്‍ സ്വന്തമായി ഒരു അക്കൗണ്ട് തുടങ്ങുന്നത്. ശ്രീനിവാസന്‍‌ പാട്യം എന്ന വിലാസത്തിലാണ് പുതിയ അക്കൗണ്ട് തുടങ്ങിയത്. നാട്ടുകാരോട് ഉപദേശം അല്ലാത്ത മറ്റെന്തെങ്കിലും കാര്യമുണ്ടെങ്കില്‍ ഈ അക്കൗണ്ടിലൂടെ ഇനി കാണാമെന്നും ശ്രീനിവാസന്‍ പറയുന്നു.

താരത്തിന്റെ വാക്കുകൾ ഇങ്ങനെയാണ്..

ഫേയ്ക്കന്മാര്‍ ജാഗ്രതൈ, ഒറിജിനല്‍ വന്നു, എന്ന് കുറിച്ചുകൊണ്ടാണ് അദ്ദേഹം വീഡിയോ പങ്കുവെച്ചത്. ഫെയ്‌സ്ബുക്കില്‍ എനിക്കിത് വരെ അക്കൗണ്ടുകള്‍ ഇല്ല. പക്ഷെ എന്റെ സുഹൃത്തുക്കളുടെ സഹായത്തോടെ എനിക്ക് ആറ് വ്യാജ അക്കൗണ്ടുകള്‍ ഉണ്ടെന്നാണ് അറിയാന്‍ കഴിഞ്ഞത്. അതിലൂടെ പല കാര്യങ്ങളും ഞാന്‍ പറഞ്ഞതായി പ്രചാരണം നടക്കുന്നുമുണ്ട്. ഉദാഹരണത്തിന് എന്റെ മകന്‍ വിനീതിന് ഞാന്‍ ചില ഉപദേശങ്ങള്‍ നല്‍കിയതായി പറയുന്നു. അതായത് വിനീതിനോട് സി.പി.എമ്മില്‍ ചേരണമെന്ന് ഒരിക്കല്‍ പറഞ്ഞുവെന്നും പിന്നീട് ചേരരുതെന്ന് പിന്നീടൊരിക്കല്‍ പറഞ്ഞുവെന്നും പറയുകയുണ്ടണ്ടായി.

വിനീതിനോട് ഇന്നേവരെ ഞാന്‍ രാഷ്ട്രീയം സംസാരിച്ചിട്ടില്ല. കാരണം ഓരോരുത്തര്‍ക്കും പ്രായപൂര്‍ത്തിയാവുമ്ബോള്‍ ലോകത്ത് നടക്കുന്നത് എന്താണെന്ന് തിരിച്ചറിയാനുള്ള കഴിവുണ്ട്. ഉണ്ടാവണം. വിനീതിന് അങ്ങനെ ഒരു കഴിവുണ്ടെന്നാണ് ഞാന്‍ വിശ്വസിക്കുന്നത്. വിനീതിന് മാത്രമല്ല തങ്ങളുടെ നിലപാടുകളും താത്പര്യങ്ങളും പുറത്തു പറയാന്‍ താത്പര്യമില്ലാത്തവര്‍ക്ക് പോലും അവര്‍ക്ക് പറയാനുള്ള കാര്യങ്ങളെ കുറിച്ച്‌ വ്യക്തമായ ധാരണയുണ്ടാകും. അതുകൊണ്ട് എന്റെ ഉപദേശമോ അഭിപ്രായമോ ആര്‍ക്കും ആവശ്യമില്ല. അങ്ങനെ ഞാന്‍ ആരേയും ഉപദേശിക്കാറില്ല. ലോകത്തിലെ ഏറ്റവും വൃത്തികെട്ട പരിപാടിയാണ് ഉപദേശമെന്ന് എനിക്കറിയാം. എന്നെ പറ്റി ഈ വ്യാജ അക്കൗണ്ടുകളില്‍ എഴുതുന്നവര്‍ക്ക് ആ സത്യം അറിയില്ലായിരിക്കും. അവര്‍ ഇനിയെങ്കിലും അത് മനസിലാക്കണം. ശ്രീനിവാസന്‍ പാട്യം ബ്രാക്കറ്റില്‍ ശ്രീനി എന്ന് പറയുന്ന അക്കൗണ്ട് ഔദ്യോഗികമായി ഞാന്‍ തുടങ്ങിയിരിക്കുകയാണ്. പാട്യം എന്റെ നാടാണ്. അതിലൂടെ എനിക്ക് പറയാനുള്ള ഉപദേശമല്ലാത്ത കാര്യങ്ങള്‍ പറയാന്‍ ഞാന്‍ ശ്രമിക്കുകയാണ്

ഇതുവരെ തനിക്ക് ഫേസ്ബുക്ക് അക്കൗണ്ട് ഇല്ലായിരുന്നു. പുതുതായി തുടങ്ങിയ Sreenivasan Pattiam(sreeni) എന്ന പേരിലുള്ളതാണ് ഔദ്യോഗിക അക്കൗണ്ടെന്നും ഇതേ പേജിലൂടെ പുറത്തുവിട്ട വീഡിയോയില്‍ താരം പറയുകയാണ്.