പ്രിയപ്പെട്ട സഹപ്രവര്ത്തകനെ അവസാനമായി ഒരുനോക്കു കാണാന് നടന് മോഹന്ലാല് വീട്ടിലെത്തി അന്തിമോപചാരം അര്പ്പിച്ചു...
പ്രിയപ്പെട്ട സഹപ്രവര്ത്തകനെ അവസാനമായി ഒരുനോക്കു കാണാന് നടന് മോഹന്ലാല് എത്തി.ഇരിങ്ങാലക്കുടയിലെ വീട്ടിലെത്തിയാണ് അന്തിമോപചാരം അര്പ്പിച്ചത്. രാജസ്ഥാനില് ലിജോ ജോസ് പെല്ലിശ്ശേരിയുടെ സിനിമയുടെ ഷൂട്ടിങ്ങിലായിരുന്ന മോഹന്ലാല് ഇന്നസെന്റിന് അന്ത്യാഞ്ജലി അര്പ്പിക്കാനാണ് കേരളത്തിലെത്തിയത്.
ഇരിങ്ങാലക്കുട ടൗണ്ഹാളിലെ പൊതുദര്ശനത്തിന് ശേഷമാണ് ഇന്നസെന്റിന്റെ മൃതദേഹം വീട്ടിലേക്ക് കൊണ്ടുവന്നത്. കൊച്ചിയിലും ഇരിങ്ങാലക്കുട ടൗണ്ഹാളിലും പൊതു ദര്ശനത്തിന് വെച്ചപ്പോഴും, പിന്നീട് വീട്ടിലേക്ക് മൃതദേഹം കൊണ്ടുവന്നപ്പോഴും നിരവധി പേരാണ് പ്രിയ താരത്തെ അവസാനമായി ഒരു നോക്കു കാണാനും അന്ത്യാഞ്ജലി അര്പ്പിക്കാനുമായി എത്തിയത്.
അതേസമയം രാവിലെ ഇന്നസെന്റിനെ അനുസ്മരിച്ച് മോഹന്ലാല് ഹൃദയഹാരിയായ കുറിപ്പ് ഫെയ്സ്ബുക്കില് പങ്കുവെച്ചിരുന്നു. 'ആ പേരുപോലെ തന്നെ നിഷ്കളങ്കമായി ലോകത്തിന് മുഴുവന് നിറഞ്ഞ ചിരിയും സ്നേഹവും സാന്ത്വനവും പകര്ന്ന്, ഒപ്പമുള്ളവരെ ഒരു സഹോദരനെപ്പോലെ ചേര്ത്തുപിടിച്ച്, എന്ത് കാര്യത്തിനും കൂടെ നിന്ന്, തണലും തലോടലുമായ നിങ്ങളുടെ വേര്പാടിന്റെ സങ്കടം എങ്ങനെ വാക്കുകളില് ഒതുക്കും എന്നറിയില്ല. പോയില്ല എന്ന് വിശ്വസിക്കാനാണ് ഇപ്പോഴും മനസ്സ് പറയുന്നത്.' എന്നായിരുന്നു മോഹന്ലാല് കുറിച്ചത്.
"
https://www.facebook.com/Malayalivartha