തെന്നിന്ത്യന്‍ സിനിമകളില്‍ ഒരു കാലത്ത് നിറഞ്ഞു നിന്നിരുന്ന നടിയാണ് ഷക്കീല. തമിഴ്, തെലുങ്ക്, മലയാളം, കന്നഡ ഭാഷകളില്‍ എല്ലാം അഭിനയിച്ചിട്ടുണ്ടെങ്കിലും ഷക്കീല കൂടുതല്‍ തിളങ്ങിയത് മലയാളത്തില്‍ ആയിരുന്നു. സില്‍ക് സ്മിതയ്ക്ക് ശേഷം തെന്നിന്ത്യന്‍ സിനിമ ലോകത്ത് മാദക സുന്ദരി ആയിട്ടായിരുന്നു ഷക്കീല വിശേഷിപ്പിക്കപ്പെട്ടത്. എന്നാല്‍ ഏറെ കാലമായി സിനിമകളില്‍ നിന്നൊക്കെ മാറി നിന്ന താരം അടുത്ത കാലത്തായി സിനിമകളില്‍ സജീവമായി നില്‍ക്കുകയാണ്. ടെലിവിഷന്‍ ഷോകളിലും പരമ്ബരകളിലും താരം സജീവമാണ്.

മലയാളത്തില്‍ ഫ്‌ളവേഴ്‌സ് ടിവിയില്‍ സംപ്രേഷണം ചെയ്യുന്ന സുരഭിയും സുഹാസിനിയും എന്ന പരമ്ബരയിലും ഷക്കീല അഭിനയിക്കുന്നുണ്ട്. ഷക്കീലയുടെ മലയാളം പരമ്ബരകളിലേക്കുള്ള അരങ്ങേറ്റം ആണ് ഇത്. അടുത്തിടെ നല്‍കിയ അഭിമുഖങ്ങളിലൊക്കെ മലയാളത്തില്‍ നല്ല സിനിമകളുടെ ഭാഗമാകണമെന്ന ആഗ്രഹവും ഷക്കീല പ്രകടിപ്പിച്ചിരുന്നു. അതിനിടെ ഒരു അഭിമുഖത്തില്‍ ഷക്കീല ദിലീപിനെ കുറിച്ച് പറഞ്ഞ വാക്കുകളും വൈറലായി മാറുകയാണ്.

തനിക്ക് ദിലീപിനൊപ്പം അഭിനയിക്കാന്‍ ആഗ്രഹമുണ്ടെന്നാണ് ഷക്കീല പറഞ്ഞത്. ഒരു സീനിലെങ്കിലും അഭിനയിക്കണം. അത്രയും നല്ല നടനാണ് അദ്ദേഹം എന്നൊക്കെ ആയിരുന്നു വാക്കുകള്‍. ഒരു ചാനലിന് നല്‍കിയ അഭിമുഖത്തില്‍ ഒപ്പം അഭിനയിക്കാന്‍ ആഗ്രഹമുള്ള നടനാരാണെന്ന ചോദ്യത്തിന് മറുപടി പറയുകയായിരുന്നു ഷക്കീല.

'ദിലീപിന്റെ കൂടെ നല്ല കഥാപാത്രം ചെയ്യണമെന്നാണ് ആഗ്രഹം. നായികയാവണം എന്നൊന്നുമില്ല. നല്ലൊരു ക്യാരക്ടര്‍ ചെയ്യണം. ഞാന്‍ ചാന്തുപൊട്ട് സിനിമ കണ്ടിരുന്നു. അത് കണ്ടത് മുതല്‍ തോന്നിയ ആഗ്രഹമാണ്. അയാള്‍ വളരെ നല്ല നടനാണ്. ഒരു സീനെങ്കിലും നല്ലത് ആണെങ്കില്‍ ചെയ്യണമെന്നാണ് ആഗ്രഹം. ഇതുവരെ കാണനോ സംസാരിക്കാനോ കഴിഞ്ഞിട്ടില്ല', എന്നായിരുന്നു ഷക്കീല പറഞ്ഞത്.