പ്രശസ്ത ചലച്ചിത്ര നിര്മാതാവ് കെ. രവീന്ദ്രനാഥ് അന്തരിച്ചു
മലയാള സിനിമയ്ക്ക് ലോകസിനിമാ ഭൂപടത്തില് ഇടംനേടിക്കൊടുത്ത ഒരുപിടി ചിത്രങ്ങളുടെ നിര്മാതാവ് കെ. രവീന്ദ്രനാഥ് (90) അന്തരിച്ചു. ഇക്കഴിഞ്ഞ തിങ്കളാഴ്ചയായിരുന്നു അദ്ദേഹം നവതി ആഘോഷിച്ചത്.
ആകെ നിര്മിച്ച 14 സിനിമകള്ക്ക് 18 ദേശീയ, സംസ്ഥാന പുരസ്കാരങ്ങളാണ് ലഭിച്ചത്. എസ്തപ്പാന് എന്ന സിനിമയില് മുഖംകാണിച്ചിട്ടുണ്ട്.
കേരളത്തിലെ കശുവണ്ടി വ്യവസായത്തിലും കെ.രവീന്ദ്രനാഥ് എന്ന പേര് വിസ്മരിക്കാനാവില്ല. ജനറല് പിക്ചേഴ്സ് രവി, അച്ചാണി രവി, രവി മുതലാളി അങ്ങനെ പലപേരുകളിലും അദ്ദേഹത്തെ നാട് സ്നേഹാദരവോടെ വിളിച്ചിരുന്നു.
ജനറല് പിക്ചേഴ്സ് ആരംഭിച്ചത് 1967-ല് 'അന്വേഷിച്ചു കണ്ടെത്തിയില്ല' എന്ന ചിത്രം നിര്മിച്ചുകൊണ്ടായിരുന്നു . സംവിധാനം പി.ഭാസ്കരന് ആയിരുന്നു. 68-ല് 'ലക്ഷപ്രഭു', 69-ല് 'കാട്ടുകുരങ്ങ്' എന്നീ ചിത്രങ്ങളും പി.ഭാസ്കരന് ജനറല് പിക്ചേഴ്സിനുവേണ്ടി സംവിധാനം ചെയ്തു.
73-ല് എ.വിന്സെന്റിന്റെ 'അച്ചാണി', 77-ല് 'കാഞ്ചനസീത', 78-ല് 'തമ്പ്', 79-ല് 'കുമ്മാട്ടി' 80-ല് 'എസ്തപ്പാന്', 81-ല് 'പോക്കുവെയില്' എന്നീ ചിത്രങ്ങള് അരവിന്ദന് ഒരുക്കി.
82-ല് എം.ടി.വാസുദേവന് നായര് 'മഞ്ഞ്' സംവിധാനം ചെയ്തു. 84-ല് 'മുഖാമുഖം', 87-ല് 'അനന്തരം', 94-ല് 'വിധേയന്' എന്നീ ചിത്രങ്ങള് അടൂര് ഗോപാലകൃഷ്ണനും സാക്ഷാത്കരിച്ചു.
ഭാര്യ ഉഷ 'തമ്പ്' എന്ന സിനിമയില് പിന്നണി പാടിയിട്ടുണ്ട്. സമഗ്രസംഭാവനയ്ക്കുള്ള ജെ.സി.ദാനിയേല് പുരസ്കാരം നേടിയ രവീന്ദ്രനാഥന് നായര് ദേശീയ ചലചിത്ര അവാര്ഡ് കമ്മിറ്റി അംഗമായും സെന്ട്രല് ബോര്ഡ് ഓഫ് ഫിലിം സര്ട്ടിഫിക്കേഷന് അംഗമായും ചലച്ചിത്ര വികസന കോര്പ്പറേഷന് അംഗമായും പ്രവര്ത്തിച്ചിട്ടുണ്ട്.
"
https://www.facebook.com/Malayalivartha