കുഞ്ചാക്കോ ബോബന്‍ നായകനായി പ്രദര്‍ശനത്തിനെത്തിയ ചിത്രമാണ് 'പദ്മിനി'. സെന്ന ഹെഗ്‌ഡെയാണ് ചിത്രത്തിന്റെ സംവിധാനം.കോടികള്‍ പ്രതിഫലമായി വാങ്ങിയിട്ടും 'പദ്മിനി' സിനിമയുടെ പ്രമോഷനു സഹകരിച്ചില്ലെന്ന വിവാദത്തില്‍ കുഞ്ചാക്കോ ബോബന് പിന്തുണയുമായി നിര്‍മാതാവ് ഹൗളി പോട്ടൂര്‍.

'ഭയ്യാ ഭയ്യാ' എന്ന സിനിമ സാമ്പത്തികമായി പരാജയപ്പെട്ടപ്പോള്‍ കുഞ്ചാക്കോ ബോബനാണ് തനിക്കൊപ്പം നിന്നതെന്ന് ഹോളി പോട്ടൂര്‍ പറയുന്നു. 'പദ്മിനി'ക്ക് മികച്ച പ്രതികരണമാണ് ലഭിക്കുന്നത്. ദീപു പ്രദീപിന്റേതാണ് ചിത്രത്തിന്റെ തിരക്കഥ. ശ്രീരാജ് രവീന്ദ്രനാണ് ചിത്രത്തിന്റെ ഛായാഗ്രാഹണം. കുഞ്ചാക്കോ ബോബനോടൊപ്പം അപര്‍ണ ബാലമുരളി, മഡോണ സെബാസ്റ്റ്യന്‍, വിന്‍സി അലോഷ്യസ് തുടങ്ങിയവരും 'പദ്മിനി'യില്‍ വേഷമിട്ടിരിക്കുന്നു.

കുറിപ്പിന്റെ പൂര്‍ണ രൂപം...

'അയാളെ ഇങ്ങനെ കല്ലെറിയരുത്, പൊറുക്കാന്‍ കഴിയാത്ത തെറ്റാണത്' എന്ന തലക്കെട്ടോടെയൊണ് കുറിപ്പ്. എന്റെ പേര് ഹൗളി പോട്ടൂര്‍. 'മഞ്ഞുപോലൊരു പെണ്‍കുട്ടി', 'പളുങ്ക്', 'പരുന്ത്', 'ഫോട്ടോഗ്രാഫര്‍, 'രാപ്പകല്‍' തുടങ്ങി പന്ത്രണ്ട് മലയാള സിനിമകളുടെ നിര്‍മാതാവാണ്. ഞാന്‍ ഒടുവില്‍ ചെയ്ത ചിത്രം ആയിരുന്നു 'ഭയ്യാ ഭയ്യാ'.

ഇപ്പോള്‍ രൂക്ഷമായ സൈബര്‍ ആക്രമണം നേരിടുന്ന കുഞ്ചാക്കോ ബോബനായിരുന്നു നായകന്‍. നിങ്ങള്‍ക്കറിയാം ഭയ്യാ ഭയ്യാ സാമ്പത്തികമായി വിജയമായിരുന്നില്ല. നിര്‍മാതാവ് എന്ന നിലയില്‍ എനിക്ക് വലിയ നഷ്ടം സംഭവിച്ചിരുന്നു.അന്ന് തകര്‍ന്നുപോയ എന്നെ തേടി ഒരു ഫോണ്‍കോള്‍ വന്നു. കുഞ്ചാക്കോ ബോബന്റെ കോള്‍. അന്ന് അയാള്‍ പറഞ്ഞ വാക്ക് ഇന്നും മനസ്സിലുണ്ട്. 'ചേട്ടാ വിഷമിക്കേണ്ട, ഞാന്‍ ഒപ്പമുണ്ട്. നമുക്കിനിയും സിനിമ ചെയ്യണം. വിളിച്ചാല്‍ മതി. ഞാന്‍ വന്ന് ചെയ്യാം'

അന്ന് ആ വാക്കുകള്‍ തന്ന ആശ്വാസം ചെറുതല്ല. തകര്‍ന്നിരുന്ന എനിക്ക് ഉയിര്‍ത്തെണീക്കാനുള്ള ആത്മവിശ്വാസം അതിലുണ്ടായിരുന്നു. ഒന്നേ പറയുന്നുള്ളൂ, ഞാന്‍ ഇനിയും സിനിമ ചെയ്യും. അതില്‍ കുഞ്ചാക്കോ ബോബനും ഉണ്ടായിരിക്കും. സ്‌നേഹത്തോടെ ഹൗളി പോട്ടൂര്‍.'

രണ്ടരക്കോടി രൂപ പ്രതിഫലം വാങ്ങിയിട്ടും സിനിമയുടെ പ്രമോഷന് പങ്കെടുത്തില്ലെന്നതാണ് കുഞ്ചാക്കോ ബോബനെതിരായ ആരോപണം. നിര്‍മാതാവായ സുവിന്‍ കെ.വര്‍ക്കിയാണ് സമൂഹമാധ്യമങ്ങളിലൂടെ ചാക്കോച്ചനെതിരെ രംഗത്തെത്തിയത്. 25 ദിവസത്തെ ഷൂട്ടിനു വേണ്ടിയാണ് 2.5 കോടി പ്രതിഫലം വാങ്ങിയത്. സിനിമയുടെ റോ ഫൂട്ടേജ് കണ്ട മാര്‍ക്കറ്റിങ് കണ്‍സല്‍റ്റന്റ് ഈ സിനിമയുടെ പ്രമോഷനു വേണ്ടി ചാര്‍ട്ട് ചെയ്ത എല്ലാ പ്രമോഷനല്‍ പ്ലാനുകളും തള്ളിക്കളയുകയായിരുന്നുവെന്നും സിനിമയിലെ നായകന്റെ ഭാര്യയാണ് ഈ മാര്‍ക്കറ്റിങ് കണ്‍സല്‍റ്റന്റിനെ നിയോഗിച്ചിരുന്നതെന്നും സുവിന്‍ പറയുന്നു.