സിനിമാ സംവിധായകനെ ദുരൂഹസാഹചര്യത്തില്‍ പൊള്ളലേറ്റ് മരിച്ചനിലയില്‍ കണ്ടെത്തി. 'കലാമണ്ഡലം ഹൈദരാലി' സിനിമയുടെ സംവിധായകനായ കിരണ്‍ ജി നാഥാണ് (48) മരിച്ചത്.

ആലുവ യുസി കോളേജിനുസമീപം വാലിഹോംസിലെ ഇല്ലിക്കുളത്ത് സ്യമന്തകം വീട്ടില്‍ മരിച്ചനിലയില്‍ കണ്ടെത്തുകയായിരുന്നു. കരുവാറ്റ സ്വദേശിയാണ്. പറവൂര്‍ താലൂക്ക് കാര്‍ഷിക ഗ്രാമവികസന ബാങ്ക് ജീവനക്കാരിയായ ഭാര്യ ജയലക്ഷ്മി ജോലികഴിഞ്ഞ് ചൊവ്വ വൈകുന്നേരം വീട്ടിലെത്തിയപ്പോഴാണ് ഇദ്ദേഹത്തെ പൊള്ളലേറ്റ് മരിച്ചനിലയില്‍ കണ്ടത്. ആലുവ ഈസ്റ്റ് പൊലീസ് അസ്വാഭാവിക മരണത്തിന് കേസെടുത്തിട്ടുണ്ട്.

കാര്‍ഷിക ഗ്രാമവികസന ബാങ്കിലെ ഭരണസമിതി അംഗങ്ങളായ പ്രാദേശിക കോണ്‍ഗ്രസ് നേതാക്കള്‍ക്കെതിരെ കിരണിന്റെ ഭാര്യ ജയലക്ഷ്മി പരാതി നല്‍കിയിരുന്നു. മാനസികമായി പീഡിപ്പിക്കുന്നുവെന്നാണ് 2022 മെയ് അഞ്ചിന് മുഖ്യമന്ത്രിക്ക് പരാതി നല്‍കിയത്.

ഇതേത്തുടര്‍ന്ന് കിരണും കുടുംബവും ഭീഷണിയും സമ്മര്‍ദവും നേരിട്ടിരുന്നതായി സൂചനകളുണ്ട്. അടുത്തിടെ, സംസ്ഥാന കാര്‍ഷികവികസന ബാങ്ക് ഭരണസമിതി അംഗമായി തെരഞ്ഞെടുത്ത വ്യക്തി ഉള്‍പ്പെടെയുള്ളവര്‍ക്ക് എതിരെയാണ് ജയലക്ഷ്മി പരാതി നല്‍കിയിരുന്നത്. ഇയാളുടെ സഹോദരന്റെ നേതൃത്വത്തിലുള്ള സംഘം അടുത്തിടെ കിരണിനെ മര്‍ദിക്കുകയും ചെയ്തിരുന്നു. പഞ്ചായത്ത് അംഗംകൂടിയാണ് മര്‍ദനത്തിന് നേതൃത്വം നല്‍കിയ വ്യക്തി. കിരണിനെതിരെ അക്രമികള്‍ പൊലീസില്‍ പരാതി നല്‍കുകയും കേസെടുപ്പിക്കുകയും ചെയ്തു.

കുറച്ചുനാള്‍മുമ്പ് കിരണിന് വിദേശത്ത് ജോലിക്ക് അവസരം ലഭിച്ചെങ്കിലും കേസുള്ളത് വിനയായി മാറി. ആലുവ ജില്ലാ ആശുപത്രിയില്‍ ബുധന്‍ രാവിലെ പോസ്റ്റ്‌മോര്‍ട്ടത്തിനുശേഷം മൃതദേഹം വൈകുന്നേരത്തോടെ സംസ്‌കാരം നടത്തി. ഒരു മകളുണ്ട്.