വര്‍ഷങ്ങള്‍ക്ക് ശേഷം താന്‍ ജോലി ചെയ്ത അതേ ബസ് ഡിപ്പോയില്‍ തിരിച്ചെത്തിയിരിക്കുകയാണ് രജനികാന്ത്
കണ്ടക്ടറായി ജോലി ചെയ്ത് ഇന്ന് തമിഴ് സിനിമയുടെ 'തലൈവര്‍' ആയി വാഴുന്ന ആളാണ് രജനികാന്ത്. ഇപ്പോഴിതാ വര്‍ഷങ്ങള്‍ക്ക് ശേഷം താന്‍ ജോലി ചെയ്ത അതേ ബസ് ഡിപ്പോയില്‍ തിരിച്ചെത്തിയിരിക്കുകയാണ് രജനികാന്ത്. ബെംഗളൂരുവിലെ ബെംഗളൂരു മെട്രോപൊളിറ്റന്‍ ട്രാന്‍സ്‌പോര്‍ട്ട് കോര്‍പ്പറേഷന്‍ (ബിഎംടിസി) ഡിപ്പോയില്‍ ആണ് രജനികാന്ത് അപ്രതീക്ഷിത സന്ദര്‍ശനം നടത്തിയത്. ഡ്രൈവര്‍മാര്‍, കണ്ടക്ടര്‍മാര്‍, ഹെല്‍പ്പര്‍മാര്‍ എന്നിവരുമായി വിശേഷങ്ങള്‍ പങ്കിട്ട അദ്ദേഹം എല്ലാവര്‍ക്കും ഒപ്പം ഫോട്ടോ എടുത്ത ശേഷം ആണ് മടങ്ങിയത്. ഹിമാലയന്‍ സന്ദര്‍ശനത്തിന് ശേഷം അടുത്തിടെയാണ് രജനികാന്ത് നാട്ടില്‍ തിരിച്ചെത്തിയത്.
ജയിലര്‍ എന്ന ചിത്രമാണ് രജനികാന്തിന്റേതായി ഏറ്റവും ഒടുവില്‍ തിയറ്ററില്‍ എത്തിയത്. മോഹന്‍ലാലും വിനായകനും ശിവരാജ് കുമാറും കസറിയ ചിത്രത്തില്‍ രമ്യ കൃഷ്ണന്‍, തമന്ന, വസന്ത് കുമാര്‍, യോഗി ബാബു തുടങ്ങി നിരവധി താരങ്ങള്‍ അണിനിരന്നിരുന്നു. ബോക്‌സ് ഓഫീസില്‍ മിന്നും പ്രകടനമാണ് റിലീസ് ദിനം മുതല്‍ ജയിലര്‍ നേടുന്നത്.
ഓഗസ്റ്റ് 10 ന് തിയറ്ററുകളിലെത്തിയ ചിത്രം മികച്ച ഓപണിംഗ് ആയിരുന്നു നേടിയത്. പല റെക്കോര്‍ഡുകളും തിരുത്തിക്കുറിച്ച ചിത്രം ഇതുവരെ 558 കോടി നേടിയെന്നാണ് വിവരം. ഇനി ഒരു ചിത്രമാണ് തമിഴ് നാട്ടില്‍ ജയിലറിന് തകര്‍ക്കാനുള്ളത്. രജനികാന്തിന്റെ തന്നെ 2.0 ആണ് അത്. 665.8 കോടിയാണ് ചിത്രത്തിന്റെ കളക്ഷന്‍.
https://www.facebook.com/Malayalivartha
