സംവിധായകന്‍ ബ്‌ളസി ആടുജീവിതം എന്ന സിനിമയ്ക്കായി പതിനാറുവര്‍ഷം മാറ്റിവച്ചതുപോലെ തനിക്ക് ചെയ്യാനാകില്ലെന്ന് നടനും സംവിധായകനുമായ പൃഥ്വിരാജ്. തനിക്ക് അത്രത്തോളം കഴിവും ഫോക്കസും കണ്‍വിക്ഷനും ഉണ്ടെന്ന് തോന്നുന്നില്ല. താന്‍ അങ്ങനെയൊരു സാഹചര്യം നേരിട്ടിട്ടില്ലെന്നും പൃഥ്വിരാജ് പറഞ്ഞു. ഒരു മാധ്യമത്തോട് ആടുജീവിതം എന്ന സിനിമയുടെ വിശേഷങ്ങള്‍ പങ്കുവയ്ക്കുകയായിരുന്നു താരം.

'ചെയ്യണമെന്ന് അത്രയും ആഗ്രഹമുള്ള ഒരു സിനിമ ഇത്രവലിയ യാത്രയാകുന്ന ഒരു സാഹചര്യം നേരിട്ടിട്ടില്ല. എന്റെ ഇപ്പോഴത്തെ എന്നെക്കുറിച്ചുള്ള അറിവുവച്ച് എനിക്കത് ചെയ്യാന്‍ കഴിയുമെന്ന് തോന്നുന്നില്ല. എനിക്കതിനാല്‍ തന്നെ സംവിധായകന്‍ ബ്‌ളസിയോട് അളവില്ലാത്ത ആരാധനയുണ്ട്. വലിയൊരു സൂപ്പര്‍ഹ്യൂമന്‍ എഫോര്‍ട്ട് ആണത്'- പൃഥ്വിരാജ് പറഞ്ഞു. ലൂസിഫറിന്റെ രണ്ടാം ഭാഗമായി എമ്പുരാനെക്കുറിച്ചും താരം മനസുതുറന്നു.

എമ്പുരാന്റെ ചിത്രീകരണം ഇരുപത് ശതമാനത്തോളം പൂര്‍ത്തിയായി. മാസ് സിനിമയായിരിക്കില്ല എമ്പുരാന്‍. സത്യസന്ധമായി പറഞ്ഞാല്‍ വലിയൊരു വിജയമായി മാറിയ സിനിമയുടെ രണ്ടാം ഭാഗമാണിത്. ആള്‍ക്കാരുടെ സങ്കല്‍പ്പത്തിലുള്ള രണ്ടാം ഭാഗമല്ല താന്‍ എടുക്കുന്നതെന്നുള്ള തോന്നല്‍ തനിക്കുണ്ട്. നന്നാകുമോ ഇല്ലയോയെന്ന് ജനം പറയട്ടേയെന്നും താരം മനസുതുറന്നു.