മോഹന്‍ലാലിന് ഇന്ന് 64ാം പിറന്നാള്‍... ആശംസകളുമായി സുഹൃത്തുക്കളും ആരാധകരും
മോഹന്‍ലാലിന് ഇന്ന് 64ാം പിറന്നാള്‍. ഇന്ന് ചെന്നൈയിലെ വീട്ടില്‍ കുടുംബാംഗങ്ങള്‍ക്കൊപ്പം പിറന്നാള്‍ കേക്കു മുറിക്കും. ലാലേട്ടന്റെ പിറന്നാളിന് ആരാധകര്‍ ആശംസാ റീല്‍സുകളായിരം തയ്യാറാക്കി കഴിഞ്ഞിട്ടുണ്ട്. അതെല്ലാം ഇന്നു രാവിലെ സമൂഹമാദ്ധ്യമങ്ങളില്‍ നിറയും.
മോഹന്‍ലാല്‍ നയിക്കുന്ന റിയാലിറ്റി ഷോയുടെ ചെന്നൈയിലെ സെറ്റില്‍ ഇന്നലെയായിരുന്നു പിറന്നാള്‍ ആഘോഷം. ഷോയിലെ മത്സരാര്‍ത്ഥികള്‍ക്കൊപ്പം കേക്കു മുറിച്ചു. ഇപ്പോള്‍ അഭിനയിക്കുന്ന തരുണ്‍ മൂര്‍ത്തിയുടെ ചിത്രത്തിന്റെ ലൊക്കേഷനിലും ലാലിന്റെ പിറന്നാള്‍ ആഘോഷമുണ്ടാകും.
ചിത്രത്തിന്റെ ടൈറ്റിലും ഫസ്റ്റ് ലുക്കും ഇന്ന് റിലീസ് ചെയ്‌തേക്കും. മോഹന്‍ലാലിന്റെ അഭിനയജീവിതത്തിലെ 360-ാമത്തെ ചിത്രത്തില്‍ ശോഭനയാണ് നായിക. 15 വര്‍ഷത്തിന് ശേഷം മോഹന്‍ലാലും ശോഭനയും ഒരുമിച്ചെത്തുന്ന ചിത്രം. രജപുത്രയുടെ ബാനറില്‍ എം.രഞ്ജിത്ത് ആണ് നിര്‍മ്മിക്കുന്നത്. ഇടവത്തിലെ രേവതി നക്ഷത്രത്തിലാണ് മോഹന്‍ലാല്‍ ജനിച്ചത്.
ഇത്തവണ ജൂണ്‍ രണ്ടിനാണ് രേവതി. അമ്മ ശാന്തകുമാരിയുടെ ആഗ്രഹപ്രകാരം ക്ഷേത്രത്തിലെ പൂജകളും പിറന്നാള്‍ സദ്യയും അന്നാണ്. അതേസമയം ഇന്ത്യയൊട്ടാകെ അരാധകരെ സൃഷ്ടിച്ച മോഹന്‍ലാല്‍ രണ്ട് തവണ മികച്ച നടനടക്കം അഞ്ചോളം ദേശീയ അവാര്‍ഡുകള്‍ക്കും ഒന്‍പതോളം തവണ സംസ്ഥാന സര്‍ക്കാരിന്റെ പുരസ്‌ക്കാരങ്ങള്‍ക്കും അര്‍ഹനായിരുന്നു.
"
https://www.facebook.com/Malayalivartha
