അക്കാദമിയുടെ ജനാധിപത്യ സ്വഭാവം കാക്കും.. ചലച്ചിത്ര അക്കാദമിയുടെ താത്കാലിക ചെയര്‍മാനായി അധികാരമേറ്റ് പ്രേംകുമാര്‍
അക്കാദമിയുടെ ജനാധിപത്യ സ്വഭാവം കാക്കും.. ചലച്ചിത്ര അക്കാദമിയുടെ താത്കാലിക ചെയര്‍മാനായി അധികാരമേറ്റ് പ്രേംകുമാര്‍.
വ്യക്തിപരമായി സന്തോഷമില്ലെന്നും രഞ്ജിത് പ്രിയപ്പെട്ട സുഹൃത്താണെന്നും നടന്‍ പ്രേംകുമാര്‍.
ചലച്ചിത്ര അക്കാദമിയുടെ താത്കാലിക ചെയര്‍മാനായി അധികാരമേല്‍ക്കുന്നതിനിടയിലാണ് പ്രേംകുമാറിന്റെ പരാമര്‍ശമുള്ളത്. ലൈംഗികാതിക്രമ പരാതിയെ തുടര്‍ന്ന് അന്വേഷണം നേരിടുന്ന സംവിധായകന്‍ രഞ്ജിത്ത് രാജിവെച്ചതോടെയാണ് ചലച്ചിത്ര അക്കാദമി ചെയര്‍മാന്‍ സ്ഥാനം പ്രേംകുമാറിന് നല്‍കാനായി സര്‍ക്കാര്‍ തീരുമാനമായത്.
മലയാള സിനിമയില്‍ സ്ത്രീകളുടെ സാന്നിധ്യം ഉറപ്പിക്കാനായി പരിശീലന പദ്ധതിയുടെ രണ്ടാം ഘട്ടം ഉടന്‍ ആരംഭിക്കും. സ്ത്രീ സൗഹൃദ തൊഴിലിടമായി സിനിമ മേഖലയെ മാറ്റുമെന്നും പ്രേംകുമാര്‍ .
അതേസമയം, സിനിമ കോണ്‍ക്ലേവ് തീയതിയില്‍ അന്തിമ തീരുമാനമായില്ലെന്നും മറ്റേണ്ടവരെ മാറ്റിനിര്‍ത്താമെന്നും പ്രേംകുമാര്‍ . സ്ത്രീകളുടെ പോരാട്ടങ്ങള്‍ക്ക് വേദിയുണ്ടാകണം. അക്കാദമിയുടെ തലപ്പത്തേക്ക് വനിത വരണമെന്ന് ആവശ്യപ്പെട്ടതായും പ്രേംകുമാര്‍ കൂട്ടിച്ചേര്‍ത്തു.
മുമ്പ് , ചലച്ചിത്ര അക്കാദമിയുടെ വൈസ് ചെയര്‍മാനായിരുന്നു പ്രേംകുമാര്‍. രഞ്ജിത്ത് രാജിവെച്ച സാഹചര്യത്തിലാണ് കേരള സംസ്ഥാന ചലച്ചിത്ര അക്കാദമിയുടെ വൈസ് ചെയര്‍മാനായ പ്രേംകുമാറിന് അക്കാദമി ചെയര്‍മാന്റെ താത്കാലിക ചുമതല നല്‍കുന്നതെന്ന് പുറത്തിക്കിയ ഉത്തരവിലുണ്ട്. സാംസ്‌കാരിക വകുപ്പ് ജോയിന്റ് സെക്രട്ടറി ആര്‍ സന്തോഷാണ് ഉത്തരവിറക്കിയിട്ടുള്ളത്.
അതേസമയം പ്രേംകുമാറിന് ആശംസകള്‍ നേര്‍ന്ന് സംവിധായകന്‍ വിനയന്‍. നിഷ്പക്ഷവും നീതിപൂര്‍വ്വവുമായ പ്രവര്‍ത്തനത്തിലൂടെ ചലച്ചിത്ര മേഖലയ്ക്കും ചലച്ചിത്ര പ്രേമികള്‍ക്കും നല്ലതു ചെയ്യുവാന്‍ പ്രേംകുമാറിന് കഴിയുമെന്ന് താന്‍ ഉറച്ചു വിശ്വസിക്കുന്നതായി വിനയന്‍ ഫേസ്ബുക്കില്‍ കുറിച്ചു.
https://www.facebook.com/Malayalivartha
