മലയാളികളുടെ പ്രിയപ്പെട്ട സംഗീത സംവിധായകനാണ് ഗോപി സുന്ദര്‍. ദേശീയ പുരസ്‌കാരം അടക്കം നേടിയിട്ടുള്ള ഗോപി സുന്ദര്‍ മലയാളത്തില്‍ മാത്രമല്ല മറ്റ് ഭാഷകളിലും സംഗീതം ഒരുക്കുന്നുണ്ട്. അതേസമയം തന്റെ വ്യക്തി ജീവിതത്തിന്റെ പേരില്‍ നിരന്തരം വിമര്‍ശനങ്ങളും പരിഹാസങ്ങളും നേരിടുന്ന വ്യക്തി കൂടിയാണ് ഗോപി സുന്ദര്‍. തന്റെ പ്രണയ ബന്ധങ്ങളുടെ പേരിലാണ് ഗോപി സുന്ദര്‍ നിരന്തരമായി ആക്രമിക്കപ്പെടുന്നത്. നേരത്തെ ഗായിക അഭയ ഹിരണ്‍മയിയുമായി പ്രണയത്തിലായിരുന്നു ഗോപി സുന്ദര്‍. ഇരുവരും ഏറെക്കാലം ലിവിംഗ് ടുഗദറിലായിരുന്നു. എന്നാല്‍ പിന്നീട് ഈ ബന്ധം തകര്‍ന്നു. ഇതിന് ശേഷമാണ് ഗോപി സുന്ദര്‍ ഗായിക അമൃത സുരേഷുമായി അടുപ്പത്തിലാകുന്നത്. ആ ബന്ധവും അധികം വൈകാതെ അവസാനക്കുകയായിരുന്നു. തന്റെ പ്രണയങ്ങളുടേയും പ്രണയ തകര്‍ച്ചകളുടേയും പേരില്‍ നിരന്തരം അവഹേളിക്കപ്പെടുകയാണ് ഗോപി സുന്ദര്‍. സോഷ്യൽ മീഡിയയിൽ പെൺസുഹൃത്തുക്കളുമായി ഗോപി സുന്ദർ പങ്കുവയ്ക്കുന്ന ചിത്രങ്ങൾക്ക് വിമർശനങ്ങൾ നേരിടാറുണ്ട്. അതിന് മറുപടിയും അദ്ദേഹം നൽകാറുണ്ട്.

ഇപ്പോഴിതാ ഗോപി സുന്ദർ സമൂഹമാധ്യമങ്ങളിൽ പങ്കുവച്ച പുതിയ ചിത്രത്തിനും ‍വിമർശനങ്ങൾ ഉയരുകയാണ്. ‘വൺ ലൈഫ്’ എന്ന അടിക്കുറിപ്പോടെ പോസ്റ്റ് ചെയ്ത ചിത്രത്തിനു താഴെയാണ് നിരവധി പേർ പരിഹാസ കമന്റുകളും വിമർശനസ്വരങ്ങളുമായി എത്തിയത്. പ്രഭാതഭക്ഷണം കഴിക്കാനിരിക്കവെ പകർത്തിയ ചിത്രമാണിത്. ഫെയ്സ്ബുക്കിലും ഇൻസ്റ്റഗ്രാമിലും പങ്കുവച്ച ചിത്രത്തിനു താഴെ പരിഹാസ കമന്റുകൾ നിറഞ്ഞു. ‘എന്താണൊരു കള്ളച്ചിരി, പുതിയതെടുത്തോ’ എന്നു ചോദിച്ച് ലോങ് സ്പേസ് ഇട്ട ശേഷം ‘ഐ ഫോണ്‍ 16?’ എന്നു കൂടി ചേർത്തായിരുന്നു ഒരു കമന്റ്. ‘എന്‍റെ കയ്യില്‍ ഐ ഫോണ്‍ 20 ഉണ്ട്. നിന്‍റെ ഫോണ്‍ എപ്പോള്‍ അപ്ഡേറ്റ് ചെയ്യും എന്നറിയിക്കൂ’ എന്നാണ് ഗോപി സുന്ദർ ഇതിനു മറുപടി നൽകിയത്. വിമർശനാത്മകമായ കമന്റുകൾകളോടെല്ലാം ഗോപി സുന്ദർ പ്രതികരിച്ചിട്ടുണ്ട്. സൗന്ദര്യ രഹസ്യം എന്താണെന്ന് ഒരാൾ ചോദിച്ചപ്പോൾ ‘ഈ നിമിഷം ജീവിക്കുക. മറ്റുള്ളവർ എന്ത് പറയുന്നു എന്നു നോക്കാറില്ല. എന്റെ ലോകം, എന്റെ ജീവിതം, എന്റെ നിയമം. അതൊരു രഹസ്യമല്ല’ എന്നാണ് ഗോപി സുന്ദർ മറുപടിയായി കുറിച്ചത്.