ബംഗാളി നടിയുടെ ലൈഗികാതിക്രമ പരാതിയില്‍ സംവിധായകന്‍ രഞ്ജിത്തിനെതിരായ കുറ്റപത്രം സമര്‍പ്പിച്ച് പ്രത്യേക അന്വേഷണ സംഘം. ഹേമ കമ്മറ്റി റിപ്പോര്‍ട്ട് പിന്നാലെ രൂപീകരിച്ച പ്രത്യേക അന്വേഷണസംഘം രജിസ്റ്റര്‍ ചെയ്ത കേസുകളിലെ ആദ്യ കുറ്റപത്രമാണിത്. എറണാകുളം ജില്ലാ മജിസ്‌ട്രേറ്റ് കോടതിയിലാണ് കുറ്റപത്രം സമര്‍പ്പിച്ചത്. എഐജി ജി പൂങ്കുഴലിയുടെ നേതൃത്വത്തിലുള്ള പ്രത്യേക സംഘമാണ് അന്വേഷണം നടത്തിയത്. ഓഗസ്റ്റ് 26നാണ് എറണാകുളം നോര്‍ത്ത് പൊലീസ് കേസെടുത്തത്. ഐ പി സി 354, 509 എണീ വകുപ്പുകള്‍ ചുമതിയാണ് കുറ്റപത്രം സമര്‍പ്പിച്ചിരിക്കുന്നത്.

2009ല്‍ സിനിമാ ചര്‍ച്ചയ്ക്കായി കടവന്ത്രയിലെ ഫ്‌ലാറ്റില്‍ വിളിച്ചു വരുത്തിയ ശേഷമാണ് നടിക്ക് നേരെ അതിക്രമം ഉണ്ടായത്. ഓഗസ്റ്റ് 26ാം തിയതിയുമാണ് ഇതുമായി ബന്ധപ്പെട്ട കേസ് എടുത്തത്. ഹേമ കമ്മറ്റി റിപ്പോര്‍ട്ടുമായി ബന്ധപ്പെട്ട് അന്വേഷണ സംഘം വരും ദിവസങ്ങളില്‍ കൂടുതല്‍ കുറ്റപത്രങ്ങള്‍ സമര്‍പ്പിക്കുമെന്നാണ് പ്രതീക്ഷിക്കുന്നത്. പാലേരി മാണിക്യം സിനിമയുടെ സെറ്റില്‍ വച്ച് തന്നോട് മോശമായി പെരുമാറിയെന്നായിരുന്നു നടിയുടെ പരാതി. പിന്നാലെ രഞ്ജിത്ത് ഇത് നിഷേധിക്കുകയും ചെയ്തു. ഈ ഘട്ടത്തിലാണ് നടി കൊച്ചി ഡിസിപിക്ക് പരാതി നല്‍കിയത്. പരാതി പിന്നീട് പ്രത്യേക അന്വേഷണ സംഘത്തിന് കൈമാറി. ഇനി എത്രയും പെട്ടന്ന് തന്നെ വിചാരണ നടപടികളിലേക്ക് കടക്കും.

'പാലേരി മാണിക്യം' എന്ന സിനിമയുടെ ഓഡിഷന് വേണ്ടി നടി ശ്രീലേഖ മിത്രയെ വിളിച്ചിരുന്നുവെന്നും എന്നാല്‍ നടി റോളിന് അനുയോജ്യയല്ലെന്ന് തീരുമാനിച്ച് തിരിച്ചയച്ചെന്നുമായിരുന്നു രഞ്ജിത്തിന്റെ പക്ഷം. സിനിമയില്‍ അഭിനയിക്കാന്‍ ക്ഷണിച്ചതിന് ശേഷം രഞ്ജിത്ത് ലൈംഗിക ഉദ്ദേശത്തോടെ അനുചിതമായി സ്പര്‍ശിച്ചതായി ഇമെയിലിലൂടെ അയച്ച പരാതിയില്‍ പരാതിക്കാരി ആരോപിച്ചു. 2009ലായിരുന്നു ഇത്. കടുത്ത സമ്മര്‍ദ്ദത്തെത്തുടര്‍ന്ന് കേരള സംസ്ഥാന ചലച്ചിത്ര അക്കാദമി ചെയര്‍മാനായിരുന്ന രഞ്ജിത്ത് രാജിവച്ചിരുന്നു.