വിശാലിനെ നായകനാക്കി സുന്ദർ സി സംവിധാനം ചെയ്ത ആക്ഷൻ കോമഡി ചിത്രമാണ് മദ ഗജ രാജ 12 വർഷങ്ങൾക്ക് ശേഷം റിലീസിനെത്തിയിരിക്കുകയാണ്. മദ ഗജ രാജ രണ്ടു ദിവസം കൊണ്ട് തമിഴ്‌നാട് ബോക്സ് ഓഫീസിൽ നിന്നായി ആറ് കോടിയിലധികം രൂപ നേടി കഴിഞ്ഞു. 12 വർഷത്തോളം റിലീസ് മുടങ്ങിയിരുന്ന ഒരു ചിത്രം ബോക്സ് ഓഫീസിൽ വലിയ പ്രതികരണം നേടുന്നത് കോളിവുഡ് സിനിമാപ്രേമികളെ അത്ഭുതപ്പടുത്തുകയാണ്. ഇപ്പോഴിതാ സിനിമയുടെ വിജയത്തിന്റെ സന്തോഷം സമൂഹ മാധ്യമങ്ങളിലൂടെ പങ്കുവെച്ചിരിക്കുകയാണ് നടി ഖുശ്ബു സുന്ദർ. രാത്രി 12 മണിക്കുള്ള ഷോയ്ക്ക് ചെന്നൈയിലെ കമല തിയേറ്ററിന് മുന്നിലെ തിരക്ക് കാണിച്ചുകൊണ്ടാണ് നടി സിനിമയുടെ വിജയത്തിന്റെ സന്തോഷം പങ്കുവെച്ചത്. 'ഇതാണ് സിനിമയുടെ യഥാർത്ഥ മുഖം, ഇതാണ് സിനിമയുടെ മാജിക്. എല്ലാവർക്കും നന്ദി,' എന്ന് ഖുശ്ബു കുറിച്ചു.