നടന്‍ ശരത്ത് കുമാറിന്റെ മകളും നടിയുമായ വരലക്ഷ്മിയെ താന്‍ വിവാഹം കഴിക്കുന്നെന്ന വാര്‍ത്ത വിശാല്‍ നിഷേധിച്ചു. ശരത്ത് കുമാറിന്റെ മകള്‍ വരലക്ഷ്മിയുമായി നടന്‍ വിശാല്‍ പ്രണയത്തിലാണെന്നും അധികം വൈകാതെ വിവാഹമുണ്ടാകുമെന്നും ചില തമിഴ് പത്രങ്ങള്‍ റിപ്പോര്‍ട്ട് ചെയ്തിരുന്നു. അതിന് പിന്നാലെയാണ് താരം വിശദീകരണവുമായി രംഗത്തെത്തിയത്. വരലക്ഷമിയും ഞാനും സുഹൃത്തുക്കള്‍ മാത്രമാണെന്നും ഞങ്ങള്‍ക്കിടയില്‍ പ്രണയവും പ്രണയ തകര്‍ച്ചയുമില്ലെന്നും നടന്‍ വ്യക്തമാക്കി.
താര സംഘടനയായ നടികര്‍ സംഘത്തിന് സ്വന്തമായി ഒരു കെട്ടിടം നിര്‍മിച്ചാല്‍ മാത്രമേ താന്‍ വിവാഹത്തെ കുറിച്ചു ചിന്തിക്കൂ എന്ന് പറഞ്ഞത് വിശാല്‍ വീണ്ടും ആവര്‍ത്തിച്ചു.

ഇതിനായി ശരത്ത് കുമാറിനോട് മത്സരിച്ച് നടികര്‍ സംഘത്തിന്റെ പ്രസിഡന്റാകാനാണ് വിശാലിന്റെ തീരുമാനം. മദഗജരാജ എന്ന ചിത്രത്തില്‍ വിശാലും വരലക്ഷ്മിയും ഒന്നിച്ചഭിനയിച്ചിരുന്നു. ഈ ചിത്രത്തിന് ശേഷം ഇരുവരും പ്രണയത്തിലായെന്നും വിവാഹം കഴിക്കാന്‍ തീരുമാനിച്ചെന്നുമായിരുന്നു വാര്‍ത്തകള്‍. പായും പുലി എന്ന ചിത്രത്തിന്റെ തിരക്കിലാണ് വിശാല്‍. സുശീന്തിരന്‍ സംവിധാനം ചെയ്യുന്ന ചിത്രത്തില്‍ കാജല്‍ അഗര്‍വാളാണ് നായിക. അത് കഴിഞ്ഞാല്‍ വിശാല്‍, ഗൗതം മേനോന്‍ സംവിധാനം ചെയ്യുന്ന ചിത്രത്തില്‍ അഭിനയിക്കും. മുമ്പ് വിശാലും ലക്ഷ്മിമേനോനും പ്രണയത്തിലാണെന്ന് വാര്‍ത്തകളുണ്ടായിരുന്നു. എന്നാല്‍ ലക്ഷ്മി അത് നിഷേധിച്ചിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha