സുധ കൊങ്കരയുടെ സംവിധാനത്തിൽ സൂര്യ നായകനായ 'സൂരറൈ പോട്ര് ഓസ്കർ ചുരുക്ക പട്ടികയിൽ നിന്നും പുറത്തായി. കഴിഞ്ഞ ദിവസമായിരുന്നു ഓസ്‌കര്‍ ചുരുക്കപ്പട്ടിക പ്രഖ്യാപിച്ചത്. നടി പ്രിയങ്ക ചോപ്ര ഗായകന്‍ നിക് ജോനാസ് എന്നിവര്‍ ചേര്‍ന്നാണ് പട്ടിക പുറത്ത് വിട്ടത്. മികച്ച നടന്‍, മികച്ച നടി, മികച്ച സംവിധായകന്‍, മികച്ച ഒര്‍ജിനല്‍ സ്‌കോര്‍ തുടങ്ങിയ വിഭാഗങ്ങളിലായിരുന്നു ഈ ചിത്രം മത്സരിച്ചത്.

ജനറൽ കാറ്റഗറിയിലായിരുന്നു ചിത്രം മത്സരിച്ചിരുന്നത്. ആമസോണ്‍ പ്രൈമിലൂടെയാണ് ‘സൂരറൈ പോട്ര്’ റിലീസ് ചെയ്തത്. മികച്ച പ്രതികരണമായിരുന്നു ഈ ചിത്രത്തിന് നേടിയത്. എയര്‍ ഡെക്കാന്‍ വിമാന കമ്ബനി സ്ഥാപകന്‍ ക്യാപ്റ്റന്‍ ഗോപിനാഥിന്റെ ജീവിതത്തെ ആസ്പദമാക്കിയുള്ള സിനിമയായിരുന്നു ‘സൂരറൈ പോട്ര്’.

സാധാരണ ജൂറി അംഗങ്ങള്‍ക്കായി ലോസ് ഏഞ്ജലീസില്‍ സിനിമയുടെ അണിയറപ്രവര്‍ത്തകര്‍ തന്നെ ഷോ സംഘടിപ്പിക്കുമായിരുന്നു. എന്നാല്‍ ഈ പ്രാവശ്യം എല്ലാം വിര്‍ച്വല്‍ ആയിരുന്നു. ഓണ്‍ലൈനായാണ് ജൂറി അംഗങ്ങള്‍ സിനിമ കണ്ടതും. അടുത്ത ഘട്ടത്തില്‍ ഫെബ്രുവരി 28 മുതല്‍ യു.എസിലെ ആറ് പ്രധാന നഗരങ്ങളിലെ ഏതെങ്കിലും തിയറ്ററുകളില്‍ ചിത്രം പ്രദര്‍ശിപ്പിക്കണമെന്നതായിരുന്നു നിബന്ധന നൽകിയിരിക്കുന്നത്. മാര്‍ച്ച്‌ 5 മുതല്‍ 10 വരെ നടക്കുന്ന വോട്ടിംഗിനു ശേഷമാണ് 15-ന് ഈ വര്‍ഷത്തെ നോമിനേഷനുകള്‍ പ്രഖ്യാപിച്ചിരിക്കുന്നത്.

സൂര്യ, അപര്‍ണ ബാലമുരളി, ഉര്‍വ്വശി, പരേഷ് റാവല്‍, തുടങ്ങിയവരായിരുന്നു ചിത്രത്തിലെ പ്രധാന കഥാപാത്രങ്ങൾ. ഏറെ കാലത്തിനുശേഷം പ്രേക്ഷകർ ഏറ്റെടുത്ത സൂര്യ ചിത്രമായിരുന്നു സൂരറൈ പോട്ര്.