ചിമ്പു നായകനായി എത്തിയ മാനാട് കഴിഞ്ഞ ദിവസമാണ് പുറത്തുവന്നത്. ടൈം ലൂപ്പില്‍ പറയുന്ന പൊളിറ്റിക്കല്‍ ത്രില്ലറാണ് ചിത്രം. മികച്ച അഭിപ്രായമാണ് ചിത്രത്തെക്കുറിച്ച് പുറത്തുവരുന്നത്. വര്‍ഷങ്ങള്‍ക്കു ശേഷമുള്ള ചിമ്പുവിന്റെ തിരിച്ചുവരവായിരിക്കും ചിത്രം എന്ന് വിലയിരുത്തപ്പെട്ടിരുന്നു. ഇത് ശരിവച്ചുകൊണ്ടാണ് ബോക്‌സ് ഓഫിസില്‍ നിന്ന് മികച്ച റിപ്പോര്‍ട്ടുകളാണ് പുറത്തുവരുന്നത്.

ആദ്യ ദിവസം 8.5 കോടി രൂപയാണ് ചിത്രം വാരിയത് എന്നാണ് റിപ്പോര്‍ട്ടുകള്‍. തമിഴ്‌നാട്ടില്‍ നിന്നു മാത്രമാണ്. സംസ്ഥാനത്തെ പലഭാഗത്തും മഴ ശക്തമായതിനാല്‍ പല ഷോകളും മുടങ്ങിയിരുന്നു.

അതിനിടെയാണ് ഇത്ര വലിയ കളക്ഷന്‍ ചിത്രം നേടിയത്. ചിമ്പുവിന്റെ കരിയറിലെ തന്നെ ഏറ്റവും ഉയര്‍ന്ന ആദ്യ ദിവസ കളക്ഷനാണിത്. വിജയിന്റേയും രജനീകാന്തിന്റേയും ചിത്രങ്ങള്‍ക്ക് ലഭിക്കുന്നതുപോലെയുള്ള സ്വീകാര്യതയാണ് മാനാടിന് ലഭിച്ചതെന്നാണ് റിപ്പോര്‍ട്ടുകള്‍.

ചിമ്പുവിനൊപ്പം എസ്.ജെ. സൂര്യയും പ്രധാന വേഷത്തിലുണ്ട്. ഇരുവരും ഗംഭീര പ്രകടനമാണ് ചിത്രത്തില്‍ കാഴ്ചവച്ചിരിക്കുന്നത്. അബ്ദുല്‍ ഖാലിക്ക് എന്ന യുവാവായി ചിമ്പു എത്തുന്നു. കല്യാണി പ്രിയദര്‍ശനാണ് നായിക.

യുവന്‍ ശങ്കര്‍ രാജ സംഗീതം നല്‍കിയ ഈ ചിത്രത്തില്‍ ചിമ്പുവിനെ കൂടാതെ എസ്.എ. ചന്ദ്രശേഖര്‍, കരുണാകരന്‍, ഭാരതിരാജ, അരവിന്ദ് ആകാശ്, മനോജ് ഭാരതിരാജ, പ്രേംജി അമരന്‍, ഉദയ, ഡാനിയല്‍ ആനി പോപ്പ്, രവികാന്ത് എന്നിവരും അഭിനയിക്കുന്നുണ്ട്.