സിനിമ ചിത്രീകരണത്തിനിടെ നടന്‍ വിശാലിന് പരിക്കേറ്റു. എന്റര്‍ടെയ്ന്‍മെന്റ് ട്രാക്കര്‍ ശ്രീധര്‍ പിള്ളയാണ് ഇക്കാര്യം സാമൂഹിക മാധ്യമങ്ങളിലൂടെ അറിയിച്ചത്. വിശാല്‍ കേന്ദ്ര കഥാപാത്രമായെത്തുന്ന ചിത്രം 'ലാത്തി'യുടെ ലൊക്കേഷനില്‍ വച്ചാണ് താരത്തിന് പരിക്കേറ്റത്. തുടര്‍ന്ന് ഷൂട്ടിങ് നിര്‍ത്തി വെച്ചു.

ചിത്രത്തിന്റെ ആക്ഷന്‍ രംഗങ്ങള്‍ ഷൂട്ട് ചെയ്യുന്ന വീഡിയോ നേരത്തെ വിശാല്‍ പങ്കുവച്ചിരുന്നു.ഇതേ ചിത്രത്തിന്റെ ഷൂട്ടിങിനിടെ വിശാലിന് നേരത്തെയും പരിക്കേറ്റിരുന്നു. പുലിമുരുകന്റെ' സ്റ്റണ്ട് കോറിയോഗ്രാഫര്‍ ആയിരുന്ന പീറ്റര്‍ ഹെയിനാണ് ലാത്തിക്ക് വേണ്ടിയും സംഘട്ടനം ഒരുക്കിയിരിക്കുന്നത്.

ലാത്തിയില്‍ പൊലീസ് ഉദ്യോഗസ്ഥന്റെ വേഷത്തിലാണ് വിശാല്‍ എത്തുന്നത്. സുനൈനയാണ് നായിക. നടന്‍ പ്രഭുവും പ്രധാന കഥാപാത്രത്തെ അവതരിപ്പിക്കുന്നു. വിനോദ് കുമാറാണ് ചിത്രത്തിന്റെ തിരക്കഥയെഴുതി സംവിധാനം ചെയ്യുന്നത്. റാണ പ്രൊഡക്ഷന്‍സാണ് സിനിമയുടെ നിര്‍മ്മാണം.

യുവന്‍ ശങ്കര്‍ രാജയാണ് ചിത്രത്തിന് സംഗീതം ഒരുക്കിയിരിക്കുന്നത്. എം ബാലസുബ്രമഹ്ണ്യം ഛായാഗ്രഹണം നിര്‍വഹിക്കുന്നു. എന്‍ ബി ശ്രീകാന്ത് ആണ് എഡിറ്റ്ങ്.തമിഴിന് പുറമെ മലയാളം, തെലുങ്ക്, കന്നഡ, ഹിന്ദി എന്നീ അഞ്ചു ഭാഷകളിലും ചിത്രം പ്രദര്‍ശനത്തിന് എത്തും.