തല അജിത്തിന്റെ പുതിയചിത്രം \'വേതാളത്തിന്റെ\' സസ്‌പെന്‍സ് പുറത്തായതായി റിപ്പോര്‍ട്ട്. പോസ്റ്ററിലൂടെയും ടീസറിലൂടെയും തമിഴ് സിനിമാ ലോകം തകര്‍ത്ത് മുന്നേറിയ വേതാളത്തിന്റെ പ്രമേയം സോഷ്യല്‍ മീഡിയയിലുള്‍പ്പടെ പ്രചരിക്കുകയാണ്. ചിത്രത്തില്‍ അജിത്ത് ഏഴ് വേഷങ്ങളിലെത്തുന്നുവെന്ന ആരാധകരുടെ ആകാംഷയെയും തല്ലിക്കെടുത്തുന്ന റിപ്പോര്‍ട്ടുകളാണ് പുറത്തുവന്നത്.
ചില സാഹചര്യങ്ങളില്‍ അകപ്പെടുന്നതോടെ വേതാളം എന്നപേരില്‍ അറിയപ്പെടുന്ന അധോലോക നായകനാണ് അജിത് എന്നത് പുറത്താകുന്നു. തുടര്‍ന്ന് പഴയ ശത്രുക്കളുമായുള്ള വേതാളത്തിന്റെ ഏറ്റുമുട്ടലാണ് സിനിമയുടെ പ്രമേയം.
വീരത്തിന് ശേഷം സംവിധായകന്‍ ശിവയും അജിത്തും ഒന്നിക്കുന്ന ചിത്രമെന്ന പ്രത്യേകതയോടെയാണ് \'വേതാളം\' കളം പിടിച്ചു തുടങ്ങിയത്. ചിത്രത്തില്‍ ഗണേഷ് എന്ന കാര്‍ ഡ്രൈവറുടെ ഗെറ്റപ്പിലാകും അജിത്തിന്റെ രംഗപ്രവേശം. ഗണേഷിന്റെ സഹോദരി തമിഴിന്റെ റോളാണ് ലക്ഷ്മി മേനോന്. പെയിന്റിങ്ങിനെ സ്‌നേഹിക്കുന്ന സഹോദരിയെ കോളജ് വിദ്യാഭ്യാസം ലഭ്യമാക്കുന്നതിന് കൊല്‍ക്കത്തയിലെ കോളജില്‍ പ്രവേശിപ്പിക്കാന്‍ അജിത്ത് എത്തുന്നതോടെ കഥ വഴിത്തിരിവിലെത്തുന്നു.
അജിത്തിന്റെ സുഹൃത്തിന്റെ വേഷമാണ് അപ്പുക്കുട്ടിക്ക്. തമ്പി രാമയ്യ പിതാവിന്റെ വേഷത്തിലും എത്തുന്നു. ശ്രുതി ഹാസന്‍ നായികയാകുന്ന ചിത്രം ശ്രീ സായിറാം ക്രിയേഷന്‍സിന്റെ ബാനറില്‍ എം.എം. രത്‌നവും എസ് ഐശ്വര്യയും ചേര്‍ന്നാണ് നിര്‍മിക്കുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha