സോഷ്യൽ മീഡിയയിൽ കുറച്ച് ദിവസങ്ങളായി നിറയുന്നത് 'ദ് ലെജന്‍ഡ്' സിനിമയിലെ നായകനെ കുറിച്ചുള്ള ചോദ്യമാണ്. ചിത്രത്തിന്റെ പ്രമോഷന് വേണ്ടി കൊച്ചിയിലെത്തിയ താരത്തിന് വൻസ്വീകാര്യതയാണ് ലഭിച്ചത്. ആഡംബര കാറുകളുടെയും ബുള്ളറ്റുകളുടെയും അകമ്പടിയോടെ എത്തിയ ആ താരം മറ്റാരുമല്ല ശരവണ സ്റ്റോഴ്സ് ഉടമയായ 52കാരൻ ശരവണന്‍ അരുളായിരുന്നു.

സ്വന്തം സ്ഥാപനത്തിന്റെ മോഡലായി താര സുന്ദരി ഹന്‍സികയ്ക്കും, തമന്ന ഭാട്ടിയയ്ക്കുമൊപ്പം അഭിനയിച്ചതോടെയാണ് ശരവണന്‍ അരുള്‍ എന്ന വ്യവസായി വലിയ ശ്രദ്ധനേടുന്നത്. തമിഴ്‌നാട്ടില്‍ വളരെ തരംഗം സൃഷ്ടിച്ച പരസ്യചിത്രമായിരുന്നു അത്. ഇത്തരത്തിലുള്ള വ്യത്യസ്തമായ വിപണന തന്ത്രങ്ങള്‍ തന്നെയാണ് ശരവണന്‍ അരുളിന്റെ വിജയവും.

ചിട്ടി റോബോയെ ഓർമപ്പെടുത്തുന്ന ഗെറ്റപ്പ്, രജനികാന്തിനെ ഓർമിപ്പിക്കുന്ന സ്റ്റൈൽ, മേക്കിങ്ങിലും രജനി ചിത്രങ്ങളോട് ചേർത്തുവയ്ക്കാവുന്ന സിനിമയാണ് ശരവണന്റെ ആദ്യ ചിത്രം 'ദ് ലെജന്‍ഡ്'. സംവിധായകരായ ജെഡി-ജെറി ജോഡിയാണ് ‘ദ് ലെജൻഡ്’ സംവിധാനം ചെയ്യുന്നത്. 2015 മിസ് യൂണിവേഴ്സ് മത്സരത്തിലെ ഇന്ത്യൻ പ്രതിനിധിയുമായിരുന്ന ഉർവശി റൗട്ടേലയാണ് നായികയായി എത്തുന്നത്.

ചിത്രത്തില്‍ ഒരു ശാസ്ത്രജ്ഞന്റെ വേഷത്തിലാണ് അദ്ദേഹം എത്തുന്നത്. ശരവണന്റെ സ്വപ്‌ന പദ്ധതിയാണ് ഈ സിനിമ. കോടിക്കണക്കിന് രൂപ മുടക്കി ഉണ്ടാക്കിയ സെറ്റുകളിലും വിദേശരാജ്യങ്ങളിലും തമിഴ്‌നാടിന്റെ വിവിധ ഭാഗങ്ങളിലുമായിരുന്നു സിനിമ ചിത്രീകരിച്ചത്.