സെപ്റ്റംബര്‍ ഒന്നിന് ആയിരുന്നു തമിഴ് സിനിമാ നിര്‍മാതാവ് രവീന്ദര്‍ ചന്ദ്രശേഖരനും നടി മഹാലക്ഷ്മിയും വിവാഹിതരായത്. ഏറെ നാളത്തെ പ്രണയത്തിനൊടുവിലായിരുന്നു ഇവരുടെ വിവാഹം. രവീന്ദറിന്റെയും മഹാലക്ഷ്മിയുടെയും വിവാഹ വീഡിയോകളും ചിത്രങ്ങളും സോഷ്യല്‍ മീഡിയയില്‍ വൈറലായി മാറിയിരുന്നു. അതിന് പിന്നാലെ ഇരുവർക്കും സൈബർ ആക്രമണവും നേരിടേണ്ടി വന്നിരുന്നു. ബോഡി ഷെയ്മിംഗ് കമന്റുകളായിരുന്നു കൂടുതലും.

ഇപ്പോഴിതാ ഇരുവരുടെ വിവാഹത്തെ രൂക്ഷമായി വിമര്‍ശിച്ച് എത്തിയിരിക്കുകയാണ് നടി വനിത വിജയകുമാര്‍. കർമ്മ ഈസ് എ ബിച്ച്. ഞാന്‍ നല്ല തിരക്കിലാണ്, മറ്റൊരാളുടെ ജീവിതത്തെക്കുറിച്ച് ചിന്തിക്കാനാവാത്ത വിധത്തിലുള്ള തിരക്കാണ്. എപ്പോഴാണ് തിരിച്ചടിക്കേണ്ടതെന്ന് അവള്‍ക്കറിയാം. ഞാന്‍ പൂര്‍ണമായും അവളെ വിശ്വസിക്കുന്നുണ്ടെന്നുമായിരുന്നു വനിത ട്വീറ്റ് ചെയ്തത്. നിമിഷനേരം കൊണ്ടായിരുന്നു വനിതയുടെ ട്വീറ്റ് വൈറലായി മാറിയത്.

വനിതയുടെ വിവാഹ സമയത്തെ രവീന്ദറിന്റെ പരാമര്‍ശങ്ങളും വീണ്ടും ചര്‍ച്ചയായിരുന്നു. മുന്‍ഭാര്യയില്‍ നിന്നും വിവാഹമോചനം നേടാതെയാണ് പീറ്റര്‍ പോള്‍ വനിതയെ വിവാഹം ചെയ്തതെന്നുള്ള വിവരങ്ങളായിരുന്നു ആദ്യം പുറത്തുവന്നത്. അന്ന് പീറ്ററിന്റെ ആദ്യഭാര്യയുടേയും മകനൊപ്പമായിരുന്നു രവീന്ദര്‍. വനിതയെ രൂക്ഷമായി വിമര്‍ശിച്ച് അദ്ദേഹം രംഗത്തെത്തിയിരുന്നു. അവരുടെ വിവാഹമോചനം കഴിഞ്ഞിരുന്നില്ലെന്നും പീറ്ററിന്റെ ഭാര്യ നീതി തേടിയപ്പോള്‍ അതിനൊപ്പം നില്‍ക്കുകയാണ് താന്‍ ചെയ്തതെന്നുമായിരുന്നു ചന്ദ്രശേഖര്‍ വ്യക്തമാക്കിയത്.

തന്റെ വിവാഹത്തെക്കുറിച്ച് അറിയുമ്പോള്‍ വനിത ആശംസകള്‍ നേരുമെന്നാണ് പ്രതീക്ഷിക്കുന്നതെന്നുമായിരുന്നു ചന്ദ്രശേഖര്‍ പ്രതികരിച്ചത്. എന്നാല്‍ പ്രതീക്ഷയ്ക്ക് വിപരീതമായി രൂക്ഷമായ വിമര്‍ശനവുമായാണ് വനിത എത്തിയത്. സോഷ്യല്‍മീഡിയയിലൂടെ ഇവരുടെ വാക്ക് തര്‍ക്കം തുടരുമോയെന്നാണ് പലരും ചോദിച്ചിട്ടുള്ളത്.

രവീന്ദറിന്റെ തടിയെക്കുറിച്ചായിരുന്നു പലരും വിമര്‍ശിച്ചത്. എന്റെ ശരീരത്തില്‍ മാറ്റം വരുത്താനൊന്നും മഹാലക്ഷ്മി പറഞ്ഞിട്ടില്ല. ഈ അവസ്ഥയിലാണ് അവളെന്നെ ഇഷ്ടപ്പെട്ടത്. അത് മാറ്റാനായി ശ്രമിച്ചാല്‍ മറ്റൊരാളെപ്പോലെ തൊന്നുമെന്നും അവള്‍ പറഞ്ഞിരുന്നു. മഹാലക്ഷ്മിയെപ്പോലെ തന്റേയും രണ്ടാമത്തെ വിവാഹമാണ് ഇതെന്നും ചന്ദ്രശേഖര്‍ വ്യക്തമാക്കിയിരുന്നു.