ആരാധകരെ കോരിത്തരിപ്പിച്ച് മണിരത്നത്തിന്റെ 'പൊന്നിയിൻ സെല്‍വൻ' എന്ന ചിത്രത്തിന്റെ വിജയത്തിളക്കത്തിൽ ജയം രവി. 'അരുള്‍മൊഴി വര്‍മൻ' എന്ന കേന്ദ്ര കഥാപാത്രത്തെ അവതരിപ്പിച്ചത് ജയം രവിയായിരുന്നു. ജയം രവി നായകനായി ഒട്ടേറെ ചിത്രങ്ങള്‍ ഇതിനോടകം തന്നെ പ്രഖ്യാപിക്കപ്പെട്ടിട്ടുമുണ്ട്. ഇപ്പോഴിതാ ലോകേഷ് കനകരാജിന്റെ സംവിധാനത്തിലുള്ള ചിത്രത്തിലും ജയം രവി അഭിനയിക്കാൻ സാധ്യതയുണ്ടെന്ന വാര്‍ത്തകളാണ് സാമൂഹ്യ മാധ്യമങ്ങളില്‍ പ്രചരിക്കുന്നത്.

അതായത് ജയം രവിയോട് ലോകേഷ് കനകരാജ് കഥ പറഞ്ഞുവെന്നാണ് സമൂഹ്യ മാധ്യമങ്ങളിലെ പ്രചരണം. ഇരുവരും ഒന്നിച്ചുള്ള ഫോട്ടോയും പ്രചരിക്കുകയാണ് ചെയ്യുന്നത്. ഇക്കാര്യത്തിലുള്ള ഔദ്യോഗിക പ്രതികരണം ഇതുവരെ വന്നിട്ടില്ല. ലോകേഷ് കനകരാജ് വിജയ്‍യെ നായകനാക്കിയുള്ള ചിത്രമായ 'ദളപതി 67'ന്റെ തിരക്കിലുമാണ് ഇപ്പോള്‍.

അതേസമയം 'മാസ്റ്റര്‍' എന്ന വൻ ഹിറ്റിനു ശേഷം ലോകേഷ് കനകരാജും വിജയ്‍യും വീണ്ടും ഒന്നിക്കുമ്പോള്‍ പ്രതീക്ഷകള്‍ വാനോളം ഉയരുകയാണ്. തൃഷയാണ് വിജയ്‍യുടെ നായികയായി അഭിനയിക്കുന്നത്. ഗൗതം വാസുദേവ് മേനോനും ചിത്രത്തില്‍ പ്രധാന വേഷത്തിലുമുണ്ട് എന്ന് അടുത്തിടെ അദ്ദേഹം തന്നെ സ്ഥിരീകരിച്ചിരുന്നു. ചിത്രത്തിന്റെ ഔദ്യോഗിക പ്രഖ്യാപനത്തായും ആകാംക്ഷയോടെ കാത്തിരിക്കുകയാണ് ആരാധകര്‍.