മണിരത്നം ചിത്രത്തിന്റെ ഷൂട്ടിംഗിനിടെ മലയാള നടൻ ജോജു ജോർജിന് അപകടം. 'തഗ് ലെെഫ്' എന്ന ചിത്രത്തിന്റെ ഷൂട്ടിംഗിനിടെ ഹെലികോപ്റ്ററിൽ നിന്ന് ചാടുന്ന രംഗം ചിത്രീകരിച്ചപ്പോഴായിരുന്നു അപകടം. താരത്തിന്റെ കാൽപാദത്തിന്റെ എല്ലിന് പൊട്ടൽ ഉണ്ടെന്നാണ് പുറത്തുവരുന്ന വിവരം. കമൽഹാസനും മണിരത്നവും മൂന്നരപതിറ്റാണ്ടിന് ശേഷം ഒരുമിക്കുന്ന ചിത്രമാണ് തഗ് ലെെഫ്. ജോജു ജോർജ് ഇതിന്റെ ഭാഗമാകുന്നതായി നേരത്തെ അണിയറപ്രവർത്തകർ അറിയിച്ചിരുന്നു.

ജനുവരി 18ന് തഗ്‌ ലൈഫിന്റെ ചിത്രീകരണം ചെന്നൈയിൽ ആരംഭിച്ചിരുന്നു. ചിത്രത്തിൽ പ്രധാന വേഷത്തിലാണ് ജോജു ജോർജ് എത്തുന്നതെന്നാണ് വിവരം. തൃഷയാണ് ചിത്രത്തിൽ നായിക. ജയം രവി, ഗൗതം കാർത്തിക്, നാസർ, അഭിരാമി തുടങ്ങി വമ്പൻ താരനിരയുണ്ട്. രാജ്കമൽ ഫിലിംമ്സ് ഇന്റർ നാഷണൽ, മദ്രാസ് ടാക്കീസ്, റെഡ് ജയന്റ് മൂവീസ്, ആർ. മഹേന്ദ്രൻ, ശിവ അനന്ത് എന്നിവർ ചേർന്നാണ് നിർമ്മാണം.

പോണ്ടിച്ചേരിയിൽ വെച്ചാണ് അപകടമുണ്ടായത്. ഹെലികോപ്റ്ററില്‍ നിന്നും താരം ചാടുന്ന രംഗമായിരുന്നു ചിത്രീകരിച്ചുകൊണ്ടിരുന്നത്. ഇതിനിടെ ജോജു ജോർജ് താഴേക്ക് വീഴുകയായിരുന്നു. വീഴ്ചയില്‍ ഇടതുപാദത്തിന്റെ എല്ലിന് പൊട്ടലേറ്റു. ഉടനെ തന്നെ താരത്തെ ആശുപത്രിയില്‍ പ്രവേശിപ്പിച്ച് ചികിത്സ നലകി. പ്രാഥമിക ചികിത്സയ്ക്ക് ശേഷം ജോജു ജോർജ് കൊച്ചിയില്‍ മടങ്ങിയെത്തി. വര്‍ഷങ്ങളുടെ കഠിനാധ്വാനം കൊണ്ട് മലയാള സിനിമയില്‍ സ്വന്തമായൊരു ഇടം നേടിയ നടനാണ് ജോജു ജോര്‍ജ്.

ആദ്യം ചെറിയ വേഷങ്ങളും പിന്നീട് കോമഡി റോളുകളിലും തിളങ്ങിയ ജോജു നായകനായി ആദ്യമായി അഭിനയിക്കുന്നത് ജോസഫ് എന്ന ചിത്രത്തിലാണ്. ആ സിനിമ ഇറങ്ങിയ ശേഷമാണ് ജോജുവിന്റെ കരിയര്‍ തന്നെ മാറിമറിഞ്ഞത്. പൊറിഞ്ചു മറിയം ജോസ് കൂടി സൂപ്പര്‍ ഹിറ്റായതോടെ മാസ്സ് ചെയ്യുന്ന ഒരു നായക നടനായും ജോജു മാറി. അന്യഭാഷകളില്‍ നിന്ന് വരെ പിന്നീട് ജോജുവിനെ തേടി അവസരങ്ങള്‍ വരികയുണ്ടായി.കഴിഞ്ഞ വര്‍ഷം പുറത്തിറങ്ങിയ ആന്റണിയാണ് ജോജുവിന്റെ അവസാനമിറങ്ങിയ ചിത്രം.