മേലേപ്പറമ്പില്‍ ആണ്‍വീട്‌ അടിച്ചു മാറ്റി; നയ്യാണ്ടി വിവാദത്തിലേയ്‌ക്ക്‌
വിദേശസിനിമകള്‍ കോപ്പിയടിച്ച്‌ ചിലര്‍ സിനിമയെടുക്കുമ്പോള്‍ മലയാളത്തിലെ സൂപ്പര്‍ഹിറ്റ്‌ ചിത്രമായ മേലേപ്പറമ്പില്‍ ആണ്‍വീട്‌ ഒരു തമിഴ് സംവിധായകന്‍ മോഷ്‌ടിച്ചത്‌ വിവാദമാകുന്നു. ധനുഷും നസ്രയയും ജോഡിയായി അഭിനയിച്ച നയ്യാണ്ടി മേലേപ്പറമ്പില്‍ ആണ്‍വീടിന്റെ വികല അനുകരണമാണ്‌.
കഥയും സീനുകളും മാത്രമല്ല, സംഭാഷണങ്ങളും അതേപടി മോഷ്‌ടിച്ചിരിക്കുകയാണ്‌ നയ്യാണ്ടിയില്‍. ഇതിനെതിരെ, പകര്‍പ്പവകാശ നിയമപ്രകാരം കേസു കൊടുക്കാന്‍ ഒരുങ്ങുകയാണ്‌ മേലേപ്പറമ്പില്‍ ആണ്‍വീടിന്റെ സംവിധായകനായ രാജസേനനും തിരക്കഥാകൃത്തായ രഘുനാഥ്‌ പലേരിയും. അന്തരിച്ച ഗാനരചയിതാവ്‌ ഗിരീഷ്‌ പുത്തഞ്ചേരിയുടേതാണ്‌ മേലേപ്പറമ്പില്‍ ആണ്‍വീടിന്റെ കഥ.
ജയറാം, ശോഭന, ജഗതി, നരേന്ദ്രപ്രസാദ്‌, വിജയരാഘവന്‍, ജനാര്‍ദ്ദനന്‍ തുടങ്ങിയവര്‍ പ്രധാന കഥാപാത്രങ്ങളായി അഭിനയിച്ച മേലേപ്പറമ്പില്‍ ആണ്‍വീട്‌ 125 ദിവസത്തിലധികം തീയേറ്ററുകളില്‍ ഓടിയിരുന്നു. തമിഴ്‌നാട്ടിലെ ഒരു ഗൗണ്ടറുടെ മകളെ മലയാളി യുവാവ്‌ പ്രണയിച്ചു വിവാഹം കഴിച്ചതിനുശേഷം വീട്ടുവേലക്കാരിയായി തറവാട്ടില്‍ കൊണ്ടു താമസിപ്പിക്കുകയും അയാളുടെ വിവാഹം കഴിക്കാത്ത ചേട്ടന്‍മാര്‍ക്ക്‌ അയാളുടെ ഭാര്യയോട്‌ പ്രണയം തോന്നുന്നതുമാണ്‌ മേലേപ്പറമ്പില്‍ ആണ്‍വീടിന്റെ കഥ.
2011ല്‍ മികച്ച തമിഴ് സിനിമക്കുള്ള ദേശീയ അവാര്‍ഡ്‌ കരസ്ഥമാക്കിയ സര്‍ഗുണനാണ്‌ നയ്യാണ്ടിയുടെ സംവിധായകന്‍. റീലിസിന്‌ മുമ്പ്‌, ചിത്രത്തില്‍ തന്റെ നഗ്നത പ്രദര്‍ശിപ്പിച്ചെന്നാരോപിച്ച്‌ നായികയായ നസ്രിയ കേസു കൊടുത്തതിനെ തുടര്‍ന്ന്‌ വിവാദത്തിലായ നയ്യാണ്ടി ഇനി പുതിയ നിയമക്കുരുക്കുകളിലേയ്‌ക്ക്‌ നീങ്ങുകയാണ്‌.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
