ജയലളിതയെ കുറിച്ച് സിനിമയെടുക്കുകയാണെങ്കില്‍ ആ റോള്‍ താനാണ് ചെയ്യുകയെന്ന് തെന്നിന്ത്യന്‍ നടി തൃഷ നേരത്തെ വ്യക്തമാക്കിയിരുന്നു.  തമിഴകത്തിന്റെ അമ്മ ഓര്‍മ്മയായതിനുശേഷം ഇപ്പോഴിതാ മറ്റൊരുനടി ജയലളിതയെ കുറിച്ച് സിനിമയെടുക്കാന്‍ താത്പര്യമുണ്ടെന്നറിയിച്ച് മുന്നോട്ടു വന്നിരിക്കുന്നു.

മോഡലും നര്‍ത്തകിയും നടിയുമായ സനാ ഖാനാണ് ജയലളിതയുടെ ജീവിതം സിനിമയാക്കാനാഗ്രഹിക്കുന്നത്. ചിത്രത്തില്‍ ജയലളിതയായി അഭിനയിക്കുക താന്‍ തന്നെയായിരിക്കുമെന്നാണ് സന പറയുന്നത്. ജയ ലളിതയുമായി നേരിയ രൂപസാദൃശ്യവും നടിയ്ക്കുണ്ട്.

മോഡലായി കരിയര്‍ ആരംഭിച്ച സന ബിഗ് ബോസ് റിയാലിറ്റി ഷോയുടെ ആറാം പതിപ്പിലെ മത്സരാര്‍ത്ഥിയായിരുന്നു 50 ലധികം പരസ്യ ചിത്രങ്ങളിലും വിവിധ ഭാഷകളിലായി 14 ഓളം ചിത്രങ്ങളിലും സന അഭിനയിച്ചിട്ടുണ്ട്.

സില്‍ക്ക് സ്മിതയുടെ ജീവിതകഥ പറയുന്ന ക്ലൈമാക്‌സിലൂടെ സന മലയാളത്തിലും അഭിനയിച്ചു. അടുത്തു പുറത്തിറങ്ങിയ ബോളിവുഡ് ചിത്രം വജാം തും ഹോയില്‍ സനയായിരുന്നു നായിക. ഗ്ലാമര്‍ റോളായിരുന്നു നടിയ്ക്ക് ചിത്രത്തില്‍.