തെറ്റായി എഴുതപ്പെട്ട കഥയില്‍ കണ്ടുമുട്ടിയ രണ്ടു കഥാപാത്രങ്ങളായിരുന്നു ഞങ്ങള്‍. കഥ തെറ്റായിപ്പോയതു കൊണ്ടാണ് അതിലെ കഥാപാത്രങ്ങള്‍ ഇറങ്ങിപ്പോയത്. ഞാനും വിജയും പലരും പറഞ്ഞതു പോലെ 'ബ്യൂട്ടിഫുള്‍ കപ്പിള്‍സ്' തന്നെയായിരുന്നു.

ജീവിതത്തില്‍ പല കാര്യങ്ങള്‍ക്കും ഞങ്ങള്‍ കൊടുത്തിരുന്ന പ്രാധാന്യം പലതായിരുന്നു. അതുവരെയുള്ള എന്റെ ജീവിതത്തിന്റെ തുടര്‍ച്ചയും വളര്‍ച്ചയുമാണ് ഞാനാഗ്രഹിച്ചത്. സിനിമയിലെ ഉയര്‍ച്ചയെക്കാളും വൈകാരികവും ബൗദ്ധികവും മാനസികവുമായ വളര്‍ച്ചയായിരുന്നു സ്വപ്നം കണ്ടത്. ആ വളര്‍ച്ച ഉണ്ടായില്ലെങ്കില്‍ മറ്റൊരാളായി പോവും. അങ്ങനെയൊരു ജീവിതത്തില്‍ എനിക്ക് അര്‍ഥം തോന്നിയില്ല.

മൂന്നാമതൊരാള്‍ക്ക് ഇതു മനസ്സിലാകില്ല. ജീവിതം സുന്ദരമാണെന്നാണ് എന്റെ വലിയ വിശ്വാസം. അത് സങ്കടപ്പെട്ടും സഹിച്ചും തീര്‍ക്കാന്‍ എനിക്കിഷ്ടമല്ലായിരുന്നു. ഞാന്‍ കാരണം പങ്കാളിയും വേദന സഹിക്കാന്‍ ഇടവരരുതെന്നുമുണ്ടായിരുന്നു. നല്ല പങ്കാളികള്‍ എന്നാല്‍ ഒരു യാത്രയില്‍ ഒരേ മനസ്സോടെ സഞ്ചരിക്കാനാകണം. പക്ഷേ, പലപ്പോഴും അതിനുകഴിഞ്ഞില്ല.

24 വയസ്സുള്ള പെണ്‍കുട്ടിയുടെ ആഗ്രഹങ്ങളും അവള്‍ക്ക് പറക്കാനുള്ള ആകാശങ്ങളും വലുതായിരുന്നു. ഞങ്ങള്‍ ഒരുപാടു സ്‌നേഹിച്ചു. പരസ്പരം നന്നായി പഠിച്ചു. പൊസറ്റീവായ സ്വാധീനം രണ്ടുപേരിലുമുണ്ടായിട്ടുണ്ട്. തമിഴ് സിനിമയിലെ അറിയപ്പെടുന്ന സംവിധായകനായ വിജയ്ക്ക് വിജയങ്ങള്‍ നേടിയെടുക്കാനുണ്ട്.

എനിക്കും ഉണ്ട് എന്റേതായ സ്വപ്നങ്ങള്‍. കുറേ വര്‍ഷങ്ങള്‍ കഴിഞ്ഞ്, ജീവിതത്തിന്റെ മറ്റൊരു ഘട്ടത്തിലായിരുന്നെങ്കില്‍ ഞങ്ങള്‍ക്ക് പിരിയേണ്ടി വരില്ലായിരുന്നു എന്നു തോന്നിയിട്ടുണ്ട്. പക്ഷേ, അതുവരെ സങ്കടം നിറഞ്ഞ ജീവിതം തുടരുക എന്നത് പരസ്പരം ചെയ്യുന്ന പാപമാണ്.