ഞാനല്ല താരം സിനിമയാണ് താരം: എന്നെ കാണാന്‍ മാത്രം ആരും തിയേറ്ററില്‍ വരില്ലെന്ന് നയന്‍സ്
താന്‍ അഭിനയിച്ചത് കൊണ്ട് മാത്രം സിനിമ ഓടില്ലെന്ന് നയന്‍താര. സിനിമയ്ക്ക് ഏറ്റവും അത്യാവശ്യമായ കാര്യം നല്ല കഥയും തിരക്കഥയുമാണ്. അതില്ലാതെ ഞാനുള്‍പ്പെടെ ആരൊക്കെ എന്തൊക്കെ ചെയ്താലും വിജയിക്കില്ല. ഇത് വളരെ യാഥാര്‍ത്ഥ്യമായ കാര്യമാണ്. എന്നാല്‍ പലര്‍ക്കും നല്ല കഥയോ തിരക്കഥയോ വേണ്ട. താരങ്ങളുടെ ഡേറ്റ് മതി. അത് വാങ്ങി വല്‍്ക്കുകയാണവര്‍ ചെയ്യുന്നത്. എന്നാല്‍ എല്ലാക്കാലവും അത് വിജയിക്കില്ല. ഞാന്‍ ഡേറ്റ് നല്‍കുന്നവരോടൊക്കെ പറയാറുണ്ട്, ടി.വി അടക്കമുള്ള പ്രമോഷന്‍ പരിപാടികളില്‍ പങ്കെടുക്കില്ലെന്ന്. അഡ്വാന്‍സ് വാങ്ങുന്നതിന് മുമ്പ് ഇക്കാര്യം കരാറില്‍ ഉള്‍പ്പെടുത്തുമെന്നും താരം വ്യക്തമാക്കി
എന്നെ കാണാന്‍ മാത്രം പ്രേക്ഷകര്‍ തിയേറ്ററില്‍ വരുമെന്നാണ് ചിലര്‍ പറയുന്നത്. എന്നാല്‍ താനത് വിശ്വസിക്കുന്നില്ലെന്നും നയന്‍താര പറഞ്ഞു. അങ്ങനെയാണെങ്കില്‍ താന്‍ അഭിനയിച്ച മോശം സിനിമകളും സൂപ്പര്‍ഹിറ്റാകണമായിരുന്നു. പ്രേക്ഷകനെ ഏന്തെങ്കിലും തരത്തില്‍ ആകര്‍ഷിക്കുന്ന എന്തെങ്കിലും ഉണ്ടെങ്കിലേ ഒരു സിനിമ തിയേറ്ററില്‍ കളിക്കൂ. ഇക്കാര്യം നല്ല സംവിധായകര്‍ക്ക് അറിയാം. അത്തരം സിനിമകള്‍ക്ക് താരങ്ങളുടെ പ്രമോഷന്‍ ആവശ്യമില്ല. ടി.വിയിലും മറ്റും വന്നിരുന്ന് ഒരേ വിഷയത്തെക്കുറിച്ച് മണിക്കൂറുകള്‍ സംസാരിച്ചിരിക്കാന്‍ എനിക്ക് താല്‍പ്പര്യമില്ല. ഒരു നായിക വന്ന് വേദിയില്‍ ഇരുന്നാല്‍ കഥ ഇല്ലാത്ത ചിത്രങ്ങള്‍ ഓടില്ലെന്നും നയന്‍താര പറഞ്ഞു.
കോടികള്‍ പ്രതിഫലം വാങ്ങുന്ന നയന്‍താര പ്രമോഷന്‍ പരിപാടികളില്‍ പങ്കെടുക്കുന്നില്ലെന്ന ആക്ഷേപം ഉണ്ടായതിനെ തുടര്‍ന്നാണ് താരം ഇക്കാര്യത്തിലുള്ള അഭിപ്രായം വ്യക്തമാക്കിയത്. പ്രമോഷന്‍ പരിപാടികളില്‍ പങ്കെടുക്കുകയോ, മാധ്യമങ്ങള്‍ക്ക് അഭിമുഖം നല്‍കുകയോ ചെയ്യാറില്ല നയന്‍സ്. അതുപോലെ പരസ്യചിത്രങ്ങളിലും വളരെ കുറച്ചേ അഭിനയിക്കാറുള്ളൂ. അടുത്തകാലത്തെങ്ങും ഒരു കമ്പനിയുടെ പരസ്യത്തില്‍ പോലും അഭിനയിച്ചില്ല എന്നത് ശ്രദ്ധേയമാണ്.
https://www.facebook.com/Malayalivartha
