തവക്കള എന്ന പേരില്‍ അറിയപ്പെടുന്ന തമിഴ് നടന്‍ ബാബു (47) അന്തരിച്ചു. ചെന്നൈയിലായിരുന്നു അന്ത്യം. നാല്‍പതോളം ചിത്രങ്ങളില്‍ അഭിനയിച്ചിട്ടുണ്ട്. ചിത്രീകരണം പുരോഗമിക്കുന്ന ഗാന്ധിനഗറില്‍ ഉണ്ണിയാര്‍ച്ച എന്ന ചിത്രത്തിലാണ് അവസാനമായി അഭിനയിച്ചുകൊണ്ടിരുന്നത്. ചെന്നൈ വടപളനി സ്വദേശിയാണ്.

മുപ്പത്തിരണ്ടു വര്‍ഷത്തിനുശേഷം ബാബു മലയാളസിനിമയില്‍ അഭിനയിക്കുന്ന രണ്ടാമത്തെ ചിത്രം കൂടിയായിരുന്നു ഗാന്ധിനഗറില്‍ ഉണ്ണിയാര്‍ച്ച. പ്രിയദര്‍ശന്റെ തിരക്കഥയില്‍ ആലപ്പി അഷ്‌റഫ്  സംവിധാനം ചെയ്ത് 1984 ല്‍ റിലീസ് ചെയ്ത വനിതാപൊലീസ് എന്ന ചിത്രത്തിലാണ് തവക്കള ഇതിനുമുന്‍പ് അഭിനയിച്ചത്. പ്രേംനസീറിനും സീമയ്ക്കുമൊപ്പം പക്രു എന്ന കഥാപാത്രമായി. 

ബാബു എന്ന പേരിന് മാറ്റമുണ്ടാകുന്നത് 83 ല്‍. മുന്താണി മുടിച്ചു എന്ന തമിഴ്ചിത്രത്തില്‍ തവക്കള എന്ന കഥാപാത്രമായി ബാബു അഭിനയിച്ചു. ചിത്രം ഹിറ്റ് ആയതിന് പിന്നാലെ സംവിധായകന്‍ ഭാഗ്യരാജാണ് തവക്കള എന്ന പേരിട്ടത്. 40 വര്‍ഷത്തോളമായി സിനിമാരംഗത്തുള്ള ഇദ്ദേഹം മലയാളമുള്‍പ്പെടെ ആറ് ഭാഷകളിലായി നാല്‍പതോളം ചിത്രങ്ങളില്‍ അഭിനയിച്ചിരുന്നു.