മലയാളത്തിന്റെ യുവനടി ക്രൂരമായി ആക്രമിക്കപ്പെട്ടതിന് പിന്നാലെ മറ്റുതാരങ്ങളും തങ്ങള്‍ക്കുണ്ടായ ദുരനുഭവം വെളിപ്പെടുത്തി രംഗത്തെത്തിയിരിക്കുന്നു. കൊച്ചിയില്‍ ആക്രമണത്തിന് ഇരയായ നടി ധൈര്യസമേതം പൊലീസില്‍ പരാതി നല്‍കിയതോടെയാണ് ഈ സംഭവം പുറംലോകം അറിയുന്നത്. എന്നാല്‍ പല കാരണങ്ങള്‍ കൊണ്ടും പരാതിപ്പെടാന്‍ കഴിയാതിരുന്നവരും പരാതി കൊടുത്തിട്ട് പൊലീസ് അന്വേഷണം വേണ്ടവിധം നടക്കാതിരുന്ന സംഭവങ്ങളും ഇതിന് മുന്‍പും ഉണ്ടായിട്ടുണ്ട്. നടിയുടെ വെളിപ്പെടുത്തലോടെ തനിക്കുണ്ടായ സമാനമായ അനുഭവം തുറന്നുപറയുകയാണ് നടി കാതല്‍ സന്ധ്യ.

താനും ലൈംഗികാതിക്രമത്തിന്റെ ഇരയാണെന്ന് നടി വെളിപ്പെടുത്തി. ചെന്നൈയില്‍ നടന്ന ഒരു പരിപാടിക്കിടെയാണ് താരത്തിന്റെ വെളിപ്പെടുത്തല്‍. കേരളത്തില്‍ ആക്രമിയ്ക്കപ്പെട്ട നടി എന്റെ അടുത്ത സുഹൃത്താണ്. അവള്‍ ധൈര്യശാലിയാണ്. ആ അപകടത്തില്‍ നിന്ന് ധൈര്യത്തോടെ കരയകറി. അവളെ കുറിച്ചാലോചിയ്ക്കുമ്പോള്‍ അഭിമാനമുണ്ട്- എന്ന് പറഞ്ഞുകൊണ്ടാണ് കാതല്‍ സന്ധ്യ സംസാരിച്ചു തുടങ്ങിയത്.

ലൈംഗിക അതിക്രമത്തിന് ഇരയായിട്ടുണ്ടെന്നും എന്നാല്‍ ആള്‍ക്കൂട്ടത്തിനിടയില്‍ തനിക്ക് പ്രതികരിക്കാനോ പരാതിപ്പെടാനോ കഴിഞ്ഞില്ലെന്നും താരം പറയുന്നു. 'കാതല്‍' സിനിമയിലൂടെ തമിഴ് പ്രേക്ഷകര്‍ക്കും 'ട്രാഫിക്' സിനിമയിലൂടെ മലയാളികള്‍ക്കും പ്രിയങ്കരിയായി മാറിയ താരമാണ് സന്ധ്യ. ചെന്നൈയില്‍ ഐടി ബിസിനസ് സ്ഥാപന ഉടമയായ വെങ്കട്ട് ചന്ദ്രശേഖരന്‍ ആണ് സന്ധ്യയുടെ ഭര്‍ത്താവ്.