പ്രേമം എന്ന അല്‍ഫോന്‍സ് പുത്രന്‍ ചിത്രത്തിലൂടെ വന്ന മഡോണ സെബാസ്റ്റിന്‍ ഇപ്പോള്‍ തമിഴകത്ത് തിരക്കുള്ള നടിയാണ്. ഇതിനോടകം മൂന്ന് സിനിമകള്‍ മഡോണ തമിഴകത്ത് ചെയ്തു കഴിഞ്ഞു. എന്നാല്‍ ഒട്ടും സുഖരമായ വാര്‍ത്തകളല്ല മഡോണയെ സംബന്ധിച്ച് തമിഴ് സിനിമാ ലോകത്ത് നിന്നും വന്നുകൊണ്ടിരിയ്ക്കുന്നത്.

കാതലും കടന്ത് പോകും എന്ന ചിത്രത്തിലൂടെയാണ് മഡോണ തമിഴ് സിനിമാ ലോകത്ത് എത്തിയത്. വിജയ് സേതുപതിയുടെ നായികയായി അഭിനയിച്ചു. അതിന് ശേഷം കന്‍ എന്ന ചിത്രത്തിലും വിജയ് സേതുപതിയുടെ നായികയായി എത്തി. ധനുഷ് ആദ്യമായി സംവിധാനം ചെയ്ത പവര്‍ പാണ്ടി എന്ന ചിത്രമാണ് ഏറ്റവുമൊടുവില്‍ മഡോണയുടേതായി തിയേറ്ററിലെത്തിയത്.

മഡോണ സെബാസ്റ്റിന് സെറ്റില്‍ വലിയ തലക്കനമാണത്രെ ആരോടും സംസാരിക്കില്ല. സംസാരിച്ചാവും പരുക്കന്‍ സ്വഭാവം. ഒന്നിലും പങ്കാളിയാകില്ല. തന്റെ ഭാഗം ചിത്രീകരിച്ച് കഴിഞ്ഞാല്‍ മാറി ഇരിയ്ക്കുക. സഹകരണ സ്വഭാവം നടിയുടെ ഭാഗത്ത് നിന്നില്ല എന്നൊക്കെയാണ് കോടമ്പക്കത്തുനിന്നുള്ള വാര്‍ത്തകള്‍ 

പ്രതിഫലം ഉയര്‍ത്തിയതാണ് പുതിയ വിഷയം. ധനുഷ്, വിജയ് സേതുപതി തുടങ്ങിയവരെ പോലുള്ള മുന്‍നിരനായകന്മാര്‍ക്കൊപ്പം അഭിനയിച്ചതിന് ശേഷം ഇനിയും അത്തരം മുന്‍നിര നായകന്മാര്‍ക്കൊപ്പമേ അഭിനയിക്കുകയുള്ളു അതിനു കൂടുതല്‍ പ്രതിഫലം വേണം എന്നൊക്കെയാണ് നടിയുടെ ഡിമാന്റുകള്‍.

പ്രേമത്തിലൂടെ സിനിമാ ലോകത്ത് എത്തിയ മഡോണ ഇതേ ചിത്രത്തിന്റെ റീമേക്കിലൂടെ തെലുങ്ക് സിനിമാ ലോകത്തും സാന്നിധ്യം അറിയിച്ചു. പ്രേമത്തിന് ശേഷം മലയാളത്തില്‍ ദിലീപിന്റെ നായികയായി കിങ് ലയര്‍ എന്ന ചിത്രത്തിലെത്തി. തമിഴില്‍ കാതലും കടന്ത് പോകും, കവന്‍ പവര്‍പാണ്ടി എന്നീ ചിത്രങ്ങളും ചെയ്തു. ഹ്യൂമണ്‍സ് ഓഫ് സംവണ്‍ എന്ന ഇംഗ്ലീഷ് ചിത്രത്തിന്റെ റിലീസിനായി കാത്തിരിയ്ക്കുകയാണ് നടി.